На філалагічным факультэце Беларускага дзяржаўнага ўніверсітэта прэзентавалі “Энцыклапедычнага слоўніка рэлігійнай лексікі беларускай мовы”. Аўтары новага слоўніка — кандыдат гістарычных навук, магістр тэалогіі, ксёндз Уладзіслаў Завальнюк, доктар філалагічных навук, прафесар Мікалай Прыгодзіч і вядомая настаўніца беларускай мовы Валянціна Раманцэвіч. Кніга стане памочніцай як вучоным і святарам розных канфесій, так і ўсім, хто жадае паглыбіць веды ў галіне гісторыі рэлігіі, узбагаціць сваю мову дакладнай і беларускай па ладзе сваім і змесце лексікай. Як адзначыў адзін з рэцэнзентаў слоўніка, член-карэспандэнт Нацыянальнай акадэміі навук Беларусі Аляксандр Булыка, “слоўнік зроблены на высокім навуковым узроўні, таму будзе вельмі карысны для шырокага кола карыстальнікаў”.