17–21 мая 2021 года дзяржаўная навуковая ўстанова «Інстытут эксперыментальнай батанікі імя В.Ф. Купрэвіча Нацыянальнай акадэміі навук Беларусі» пры ўдзеле дзяржаўнай прыродаахоўнай установы «Нацыянальны парк “Нарачанскі”» праводзіць XI Міжнародны навукова-практычны семінар для студэнтаў, магістрантаў, аспірантаў, выкладчыкаў і работнікаў спецыяльнасці «Лясная гаспадарка» («Лясная справа») на тэму «Дынаміка, стан і маніторынг лясных экасістэм на асабліва ахоўных прыродных тэрыторыях». Семінар прысвечаны 90-годдзю з дня заснавання Інстытута эксперыментальнай батанікі НАН Беларусі (29 сакавіка 1931 г.) і дню біялагічнай разнастайнасці (22 мая).
Мэта правядзення – умацаванне навуковых сувязей, развіццё і пашырэнне адносін паміж вучонымі, моладдзю і работнікамі спецыяльнасці «Лясная гаспадарка» («Лясная справа») акадэміі навук і вядучых ВНУ Беларусі і краін сумежных тэрыторый шляхам навуковага супрацоўніцтва, абмену вопытам, распрацоўкі сумесных праектаў і садзейнічання экалагічнай адукацыі па названай спецыяльнасці.
Падчас правядзення семінара будуць арганізаваны навукова-практычныя заняткі на тэрыторыі Нацыянальнага парку «Нарачанскі», дзе ўдзельнікі пазнаёмяцца з лесагаспадарчай і прыродаахоўнай дзейнасцю, а таксама селекцыйна-генетычнымі аб’ектамі парку, наведаюць пункты назіранняў маніторынгу воднай і лясной расліннасці, аб’ектаў маніторынгу ахоўных відаў раслін, асобных катэгорый рэдкіх біятыпаў і/ці прымеркаваных да ўнікальных прыродных комплексаў гэтай ААПТ. На семінары плануецца разгледзець прапановы і абмеркаваць сумесныя праекты, якія будуць падавацца ў розныя фонды, дзяржаўныя праграмы (у тым ліку саюзныя), а таксама перспектывы і вынікі рэалізацыі сумесных грантаў.
Рэзультатам работы семінара стане кансалідацыя намаганняў, вопыту і ведаў вучоных, выкладчыкаў і практыкаў па пытаннях ацэнкі эфектыўнасці абмежаванняў і забарон, устаноўленых у адносінах да асабліва ахоўных прыродных тэрыторый і асобных суб’ектаў расліннага свету.
Для ўдзелу ў рабоце семінара зарэгістраваліся 45 чалавек, што прадстаўляюць 10 навукова-даследчых устаноў, ВНУ Беларусі і Расіі.