20 мая 2021 года ў НАН Беларусі адбылася цырымонія адкрыцця XXIII Кангрэса Федэрацыі пчалярскіх арганізацый «Апіславія»*.
Гэта першае ў нашай краіне такое буйное міжнароднае мерапрыемства, прысвечанае праблемам пчалярства і выкарыстання яго прадукцыі, шырокага ўзаемадзеяння спецыялістаў і вучоных дадзенай галіны. У рабоце Кангрэса прымаюць удзел вядучыя пчаляры Беларусі, Расіі, Малдовы і іншых краін. Кангрэс праходзіць з рэальнай прысутнасцю ўдзельнікаў і ў анлайн-фармаце. У ходзе форума спецыялісты падзеляцца вопытам навуковага суправаджэння галіны і выкарыстання яе прадукцыі, уключаючы найноўшыя тэхналогіі вядзення і атрымання прадуктаў пчалярства. Пчаляры разгледзяць праблемныя пытанні, намецяць шляхі іх рашэння, а таксама вызначаць задачы навукі ў гэтай важнай галіне аграпрамысловага комплексу.
У Рэспубліцы Беларусь на 1 студзеня 2021 года налічвалася больш за 210 тыс. пчоласямей, у тым ліку: амаль 33 тыс. – у сельскагаспадарчых арганізацыях, больш за 4 тыс. – у сялянскіх (фермерскіх) гаспадарках. Гэта вялізныя перспектывы для атрымання якасных пчолапрадуктаў: мёду, пылку, пяргі, пропалісу, матачнага малачка, пчалінага яду, воску.
Як заўважыў, выступаючы на адкрыцці Кангрэса, намеснік Старшыні Прэзідыума НАН Беларусі Пётр Казакевіч, «важна пашыраць пасевы меданосных культур з мэтай не толькі развіцця пчалярства, але і павышэння ўрадлівасці сельскагаспадарчых культур як аднаго з рашэнняў Дактрыны харчовай бяспекі краіны». Пётр Казакевіч адзначыў актыўную работу і значныя дасягненні беларускіх вучоных па развіцці пчалярства, практычным выкарыстанні яго прадуктаў. Ён прывёў канкрэтныя прыклады: «У Інстытуце пчалярства НАН Беларусі распрацоўваецца сістэма выкарыстання пчол у павышэнні ўрадлівасці пладовых і ягадных сельскагаспадарчых раслін, вывучаюцца новыя тэхналогіі атрымання прадуктаў пчалярства. У Інстытуце генетыкі і цыталогіі рэалізаваны пілотны праект па пошуку эфектыўных ДНК-маркёраў для характарыстыкі генетычнай разнастайнасці меданосных пчол у Беларусі, у рамках якога праведзены малекулярна-генетычны аналіз і ўстаноўлены падвіды пчол, іх чыстапароднасць і ступень метысацыі. У Інстытуце эксперыментальнай ветэрынарыі імя С.М. Вышалескага вынайдзены новыя метады лячэння хвароб пчол. У Інстытуце аховы раслін праведзена тэсціраванне інсектыцыдных якасцей гербіцыдаў. У Цэнтральным батанічным садзе Акадэміі навук запланаваны навуковыя даследаванні па падборы новых меданосных раслін для пчалярскіх гаспадарак Беларусі. Акрамя гэтага, прынята рашэнне аб стварэнні або пашырэнні наяўных пчальнікоў у шэрагу арганізацый Аддзялення аграрных навук і Аддзялення біялагічных навук НАН Беларусі. Таму мы збіраемся зрабіць варты ўнёсак у гэту добрую справу».
Удзельнікі Кангрэса і Міжнароднай навукова-практычнай канферэнцыі наведаюць квітнеючыя сады РУП «Інстытут пладаводства» НАН Беларусі, а таксама пчальніка беларускіх пчаляроў і Міністэрства лясной гаспадаркі.
*«Апіславія» – федэрацыя пчалярскіх арганізацый Еўропы і Азіі, заснаваная ў 1910 годзе. Гэта адна з найбуйнейшых пляцовак для абмеркавання агульных поспехаў і праблем пчалярства ва Усходняй, Цэнтральнай Еўропе і на еўразійскай прасторы. Кожныя два гады ФПА «Апіславія» праводзіць міжнародныя кангрэсы па пчалярстве ў розных краінах.