Больш за 50 распрацовак прадставяць арганізацыі НАН Беларусі на Міжнароднай спецыялізаванай выставе «Энергетыка. Экалогія. Энергазберажэнне. Электра» (EnergyExpo’ 2021), якая праходзіць 12–15 кастрычніка 2021 года ў рамках XХV Беларускага энергетычнага і экалагічнага форуму.
Сёння адна з прыярытэтных задач біятэхналогіі – стварэнне біяраскладальных матэрыялаў для рашэння глабальнай праблемы забруджання навакольнага асяроддзя. Інстытут мікрабіялогіі НАН Беларусі прадставіць на выставе тэхналогію сінтэзу малочнай кіслаты для атрымання біяраскладальных палімерных матэрыялаў. Тэхналогія атрымання біяраскладальнага палімера – полілактыда – заснавана на ферментацыі цукразмяшчальнай сыравіны з атрыманнем стэрэаізамераў малочнай кіслаты. Вучоныя Інстытута прадэманструюць таксама біяпрэпараты для ачысткі камунальна-бытавых сцёкавых вод, біяактыватары для ачышчальных збудаванняў любога тыпу, мікробныя прэпараты для ачысткі водных раствораў ад ксілолу да талуолу.
РУП «Навукова-тэхналагічны парк “БелБіяград” НАН Беларусі» прадэманструе арганамінеральнае ўгнаенне (прэпарат, які дазваляе аднаўляць урадлівы слой зямлі), а таксама кармавыя дабаўкі пашыранага спектра дзеяння.
Вучоныя Інстытута эксперыментальнай батанікі НАН Беларусі прадставяць арыгінальную распрацоўку – асяроддзі іонаабменныя ўгнойвальныя для лясной і сельскай гаспадаркі. Яны пераўзыходзяць айчынныя і сусветныя стандарты кораненаселеных асяроддзяў, паколькі характарызуюцца высокай акупнасцю за кошт шматразовага выкарыстання без змянення прадукцыйных уласцівасцей і аптымальным наборам макра- і мікраэлементаў, дазваляюць на працягу доўгага тэрміну вырошчваць расліны без дадатковага ўнясення элементаў жыўлення. Могуць быць выкарыстаны для вырошчвання расады агародніны і кветак, у малааб’ёмных тэхналогіях ахаванага грунту, у замкнёных сістэмах жыццезабеспячэння і г.д.
Інстытут энергетыкі НАН Беларусі прадэманструе праграмна-апаратны комплекс у выглядзе бесправадной аднаўзроўневай сістэмы збору, уліку, апрацоўкі і перадачы інфармацыі аб спажыванні энергарэсурсаў (АСКУЭР) на аснове SMART-лічыльніка. Да яго пераваг адносяцца: рэагаванне на несанкцыянаванае падключэнне, прымусовае дыстанцыйнае адключэнне, магчымасць пабудовы аднаўзроўневай сістэмы АСКУЭР з перадачай інфармацыі па сетцы GSM (функцыі УЗПД выконвае SMART-лічыльнік), у тым ліку аператыўнае кіраванне.
XХV Беларускі энергетычны і экалагічны форум праходзіць у Мінску 12–15 кастрычніка 2021 года ў Футбольным манежы (пр-т Пераможцаў, 20/2). Ён уключае міжнародныя спецыялізаваныя выставы «Энергетыка. Экалогія. Энергазберажэнне. Электра» (EnergyExpo’ 2021), «Oil&Gas Technologies», «Атамэкспа-Беларусь», «ЭкспаСвятло», «Водныя і паветраныя тэхналогіі», «ЭкспаГорад» і XХV Беларускі энергетычны і экалагічны кангрэс. Мэта правядзення форуму – агляд сучасных дасягненняў навукі, тэхнікі і тэхналогій у сферы энергетыкі, энергазберажэння, аўтаматызацыі, электронікі, аховы навакольнага асяроддзя.