2 снежня 2021 года адбыўся семінар Вышэйшай атэстацыйнай камісіі Рэспублікі Беларусь (ВАК). У ім прынялі ўдзел больш за 200 чалавек: магістранты, аспіранты, дактаранты, навуковыя кіраўнікі, вучоныя сакратары Саветаў па абароне дысертацый, вучоныя сакратары арганізацый, загадчыкі аспірантуры, прадстаўнікі Саветаў маладых вучоных і інш. Мадэратарам мерапрыемства стаў Іванец Андрэй Іванавіч, Галоўны вучоны сакратар НАН Беларусі, доктар хімічных навук, старшыня Савета маладых вучоных НАН Беларусі.

Перад удзельнікамі семінара выступіў Гучок Аляксандр Яўгенавіч, Старшыня Вышэйшай атэстацыйнай камісіі Рэспублікі Беларусь, доктар юрыдычных навук. Ён падрабязна расказаў пра структуру Вышэйшай атэстацыйнай камісіі і пра тое, якія ступені праходзіць дысертацыя перад абаронай.

Якія тыповыя памылкі саіскальнікаў вучоных ступеней? Як падрыхтаваць сваю дысертацыю да абароны? Гэтыя і іншыя пытанні былі зададзены ў ходзе семінара. На іх падрабязна адказала Дубаневіч Вольга Валер’еўна, Галоўны вучоны сакратар Вышэйшай атэстацыйнай камісіі Рэспублікі Беларусь.