На Днях беларускай навукі, якія праходзілі ў рамках Сусветнай выставы «ЭКСПА-2022» з 2 па 3 лютага 2022 года ў Дубаі, вучоныя НАН Беларусі прадставілі апошнія дасягненні.
Так, Інстытут фізіка-арганічнай хіміі НАН Беларусі прадставіў унікальныя матэрыялы і тэхналогіі для ачысткі вады ад цяжкіх металаў (нікель, кобальт, свінец, жалеза) і зараджаных арганічных рэчываў. Вучонымі інстытута спецыяльна распрацаваны для вытворчасці валакністыя іонаабменныя палімерныя матэрыялы «Фібан», картрыджы і абсталяванне на іх аснове. На пасяджэнні секцыі «Медыцына, фармацэўтыка, біятэхналогіі і інфармацыйныя тэхналогіі ў медыцыне» дырэктар Інстытута фізіялогіі НАН Беларусі член-карэспандэнт НАН Беларусі Сяргей Губкін расказаў пра высокатэхналагічныя распрацоўкі НАН Беларусі ў галіне маніторынгу жыццёва важных функцый арганізма чалавека і прафілактыкі COVID-19. Беспілотным авіяцыйным комплексам, якія робяцца ў НАН Беларусі, быў прысвечаны даклад Юрыя Яцыны, дырэктара Навукова-вытворчага цэнтра многафункцыянальных беспілотных комплексаў.
Праведзены перамовы з прарэктарам па навуковай рабоце Універсітэта Аб’яднаных Арабскіх Эміратаў прафесарам Ахмедам Алі Мурадам. Бакі выказалі зацікаўленасць у наладжванні супрацоўніцтва ў галіне медыцынскіх тэхналогій і фармацэўтыкі, штучнага інтэлекту і Вялікіх даных, новых матэрыялаў і тэхналогій для ачысткі вады, ва ўзаемным абмене даследчыкамі. Беларускі бок запрасіў дэлегацыю ўніверсітэта наведаць НАН Беларусі ў маі 2022 года. Праведзены перамовы і з Хэлен Сан, кіраўніком навуковых даследаванняў Кліўлендскай клінікі Абу-Дабі. Інтарэс уяўляе супрацоўніцтва ў такіх галінах, як проціпухлінныя прэпараты, ранняя дыягностыка анкалагічных захворванняў. Дэлегацыя наведала павільёны Казахстана, Расіі, ААЭ, Саудаўскай Аравіі.
Дэлегацыя Акадэміі навук на чале з Галоўным вучоным сакратаром НАН Беларусі Андрэем Іванцом прымала ўдзел у Днях беларускай навукі, якія праходзілі на Сусветнай выставе «ЭКСПА-2022» з 2 па 3 лютага 2022 года ў Дубаі (ААЭ). У праграме – прэзентацыя даследчага і інавацыйнага патэнцыялу НАН Беларусі і правядзенне перамоў з патэнцыяльнымі замежнымі партнёрамі.