23–25 лістапада 2022 года на базе ДНУ «Інстытут біяарганічнай хіміі НАН Беларусі» праходзіць міжнародная навукова-практычная канферэнцыя «Беларускія лекі».

У форуме прымаюць удзел навукоўцы і спецыялісты Беларусі і Расіі, а таксама прадстаўнікі медыцынскіх устаноў і фармацэўтычных прадпрыемстваў краіны.

Праграма канферэнцыі ўключае пленарныя выступы, сесіі вусных і стэндавых дакладаў, выстаўку прадукцыі, якая выпускаецца айчыннымі вытворцамі.

На канферэнцыі абмяркоўваюцца такія важныя праблемы, як: фармацэўтычная вытворчасць; біяхімічная фармакалогія і фармацэўтычная хімія; праблемы, метады і прадукты сучаснай тэхналогіі лекавых рэчываў; тэхналогіі вытворчасці гатовых лекавых формаў; сучасныя метады аналізу біялагічна актыўных рэчываў; фармакагеноміка і генатэрапія; таксікалогія; даклінічныя і клінічныя выпрабаванні; біяэквівалентнасць генерычных лекавых сродкаў; клінічная фармакалогія і біяфармацэўтыка.