17 студзеня 2023 года ў Нацыянальным Прэс-цэнтры Рэспублікі Беларусь адбылася прэс-канферэнцыя на тэму «Аб падрыхтоўцы і правядзенні выстаўкі навукова-тэхнічных дасягненняў “Беларусь інтэлектуальная”».
У мерапрыемстве прынялі ўдзел Сяргей Чыжык, першы намеснік Старшыні Прэзідыума НАН Беларусі, акадэмік, Андрэй Іванец, Міністр адукацыі Рэспублікі Беларусь, і Сяргей Шлычкоў, Старшыня Дзяржаўнага камітэта па навуцы і тэхналогіях Рэспублікі Беларусь. Як адзначыў Сяргей Чыжык, выстаўка навукова-тэхнічных распрацовак «Беларусь інтэлектуальная» пройдзе ў Нацыянальным выставачным цэнтры «Белэкспа». Для наведвальнікаў 21-22 студзеня 2023 года ўваход вольны.
Як падкрэсліў Сяргей Чыжык, выстаўка будзе міжведамаснай. Экспазіцыя арганізавана па розных кластарах. У іх ліку — штучны інтэлект, IT-тэхналогіі, робататэхніка; інавацыйнае прыборабудаванне; электратранспарт і яго базавыя кампаненты; абараназдольнасць і ваенная навука; экалогія, прыродакарыстанне; біятэхналогіі; фармацыя, ахова здароўя, медыцына; аграпрамысловы комплекс, прадукты харчавання; прастора маладзёжных ініцыятыў. Чакаецца, што на выстаўцы будзе прадстаўлена каля 400 узораў, уключаючы буйнагабарытную тэхніку.
«Фізікі змогуць паказаць на выстаўцы зусім новыя рэчы, напрыклад, па перадачы інфармацыі з дапамогай лазера ў космасе. На выстаўцы будзе прадстаўлена і сістэма хуткага тэст-аналізу на вірус шляхам сканавання прабірак з узорамі. Будуць паказаны звышадчувальныя цеплавізарныя сістэмы, а таксама далямеры, якія вымяраюць адлегласць на працягу 1 км з дакладнасцю да міліметраў. На выстаўцы прадэманструюць і сістэмы для выяўлення ваганняў, у прыватнасці ў раёне БелАЭС», — расказаў першы намеснік Старшыні Прэзідыума НАН Беларусі. «Ад Акадэміі навук будуць узоры электратранспарту: два каркасныя электрамабілі і спарткар. Узровень іх лакалізацыі блізкі да 90 %. І самае галоўнае, будуць прадстаўлены кампаненты. Гэта нашы эфектыўныя электрарухавікі, якія прынятыя на вытворчасць «Магілёўліфтмашам», айчынная электроніка (завод «Вымяральнік»). Кампаненты прадставяць і рэзідэнты “Вялікага каменя”», — падкрэсліў Сяргей Чыжык.
