На базе НАН Беларусі праходзіць Кангрэс маладых вучоных Беларусі і Расіі. 28 сакавіка 2023 года ў арганізацыях Акадэміі адбыліся секцыйныя пасяджэнні па тэматыцы беларуска-расійскага маладзёжнага навуковага супрацоўніцтва. У іх прыняло ўдзел каля 500 даследчыкаў дзвюх краін.
Старшыня Прэзідыума НАН Беларусі акадэмік Уладзімір Гусакоў адкрыў пасяджэнне секцыі «Гуманітарныя навукі як аснова нацыянальнай бяспекі», якая прайшла на базе ДНУ «Інстытут гісторыі НАН Беларусі», і выступіў перад маладымі навукоўцамі з дакладам «Сацыяльна-эканамічная мадэль Рэспублікі Беларусь». Як заявіў журналістам Старшыня Прэзідыума Нацыянальнай акадэміі навук Беларусі Уладзімір Гусакоў, супрацоўніцтва маладых навукоўцаў Беларусі і Расіі дапаможа дасягнуць прарыўных вынікаў. «Супрацоўніцтва навукоўцаў нашых краін мае асаблівае значэнне, бо ў нас падобныя задачы і праблемы, у нас няма супярэчнасцей, мы адзіныя ў нашых падыходах і памкненнях. Мы не павінны адставаць ад сусветных трэндаў у навуцы. Гэта вельмі важна для ўстойлівай будучыні краіны, развіцця эканомікі і грамадства. Вядома, тут справа за моладдзю», — сказаў Уладзімір Гусакоў.
Усяго ў рамках работы Кангрэса было арганізавана сем секцый па асноўных напрамках навуковага супрацоўніцтва маладых вучоных Беларусі і Расіі. Секцыя «Фізіка і штучны інтэлект» працавала на базе ДНУ «Аб’яднаны інстытут праблем інфарматыкі НАН Беларусі»; секцыя «Тэхнічныя навукі і індустрыя» — у ДНУ «Фізіка-тэхнічны інстытут НАН Беларусі»; секцыя «Хімія і рацыянальнае прыродакарыстанне» — на базе ДНУ «Інстытут біяарганічнай хіміі НАН Беларусі»; секцыя «Сучасныя біятэхналогіі» ў ДНУ «Інстытут генетыкі і цыталогіі НАН Беларусі»; секцыя «Медыцына і фармацэўтыка» — у ДНУ «Інстытут фізіялогіі НАН Беларусі» і секцыя «Інавацыі для АПК» — на базе НПЦ НАН Беларусі па харчаванні. Удзельнікі Кангрэса не толькі заслухалі даклады вядучых вучоных НАН Беларусі па тэматыцы секцый, але і азнаёміліся з работай навуковых арганізацый. Для іх былі арганізаваны экскурсіі па лабараторыях, вытворчых участках, музеях у месцах правядзення секцыйных пасяджэнняў. Адбылася і экскурсія па ДНУ «Цэнтральны батанічны сад НАН Беларусі».
З 27 сакавіка па 1 красавіка 2023 года на базе НАН Беларусі праходзіць Кангрэс маладых вучоных Беларусі і Расіі, прымеркаваны да Дня яднання народаў Беларусі і Расіі. Рашэнне аб правядзенні Кангрэса было прынята Кіраўнікамі дзяржаў Беларусі і Расіі ў снежні 2022 года.
