28 жніўня 2023 года нагрудны знак адрознення імя У. М. Ігнатоўскага Нацыянальнай акадэміі навук Беларусі ўручаны член-карэспандэнту НАН Беларусі, дырэктару Аб’яднанага інстытута машынабудавання (2002–2006) Леаніду Краснеўскаму. Высокай узнагароды навуковец удастоены за асабісты ўклад у развіццё акадэмічнай навукі і ў сувязі з 85-гадовым юбілеем з дня нараджэння. Леанід Рыгоравіч — вядомы вучоны ў галіне машынабудавання, тэорыі і тэхнікі аўтаматычнага кіравання мабільнымі машынамі, стварэння гібрыдных аўтамабіляў. Ён даследаваў магчымасць прымянення гібрыдных сілавых установак у выпусканай беларускім машынабудаваннем цяжкай мабільнай тэхніцы, якая мае гідрамеханічныя трансмісіі. Паказаў перспектыўнасць стварэння на гэтай базе гібрыдных электрамеханічных трансмісій, якія становяцца вядучым напрамкам сусветнага развіцця гібрыдных сілавых установак. Юбіляр — аўтар больш як 250 навуковых прац, у тым ліку 1 манаграфіі, 89 аўтарскіх пасведчанняў на вынаходніцтвы і патэнтаў.

Нагрудны знак адрознення імя У. М. Ігнатоўскага Леаніду Краснеўскаму ўручыў першы намеснік Старшыні Прэзідыума НАН Беларусі акадэмік Сяргей Чыжык.