2 лістапада 2023 года на базе Інстытута філасофіі НАН Беларусі адбылося адкрыццё Беларуска-турэцкага даследчага цэнтра. Ва ўрачыстай цырымоніі прынялі ўдзел кіраўнікі НАН Беларусі, Надзвычайны і Паўнамоцны Пасол Турэцкай Рэспублікі ў Рэспубліцы Беларусь Мустафа Эскан, член апякунскага савета Фонду Маарыф Наўзат Шымшэк, прадстаўнікі Фонду Маарыф, прадстаўнікі навуковай грамадскасці і інш.
Як адзначыў на ўрачыстым адкрыцці старшыня Прэзідыума НАН Беларусі Уладзімір Гусакоў, стварэнне Цэнтра — гэта важны канструктыўны крок на шляху далейшага развіцця адносін паміж Беларуссю і Турцыяй, паміж вучонымі, грамадскімі і культурнымі дзеячамі нашых краін. Гэты крок стаў магчымым дзякуючы сяброўскім адносінам паміж лідарамі нашых дзвюх краін. «Мы добра ведаем прарыўныя вынікі турэцкай навукі, актыўна супрацоўнічаем з многімі навуковымі арганізацыямі Турцыі. Сярод іх — Навукова-даследчы савет Турцыі ЦЮБІТАК (TÜBITAK), Акадэмія навук Турцыі і інш. Сёння мы пачынаем актыўнае ўзаемадзеянне з Фондам Маарыф. Адкрыццё Беларуска-турэцкага даследчага цэнтра — толькі першы сур’ёзны крок у нашым узаемадзеянні, якое павінна актыўна праводзіцца па розных напрамках навукі, а не толькі па філасофіі», — падкрэсліў Уладзімір Гусакоў. Кіраўнік Акадэміі навук падзякаваў Пасольству Турэцкай Рэспублікі ў Рэспубліцы Беларусь, Турэцкаму фонду Маарыф за падтрымку і прасоўванне сумесных рашэнняў. Уладзімір Гусакоў прапанаваў арганізаваць вывучэнне турэцкай мовы для грамадзян краіны на базе Універсітэта НАН Беларусі.
У сваю чаргу, Надзвычайны і Паўнамоцны Пасол Турэцкай Рэспублікі ў Рэспубліцы Беларусь Мустафа Эскан адзначыў, што Турцыю і Беларусь звязваюць асаблівыя цёплыя адносіны. Але сёння неабходна рухацца наперад асабліва ў развіцці ўзаемавыгаднага супрацоўніцтва ў галіне адукацыі, навукі, даследаванняў і выходзіць на новыя высокія рубяжы.
Сумесны Беларуска-турэцкі даследчы цэнтр НАН Беларусі і Турэцкага фонду Маарыф створаны ў адпаведнасці з пратаколам аб супрацоўніцтве НАН Беларусі і Фондам культуры і адукацыі Турцыі. Яго асноўнымі задачамі з'яўляюцца: каардынацыя і правядзенне сумесных навукова-даследчых работ, асобных праектаў у сферы гісторыка-культурнай і філасофскай спадчыны Беларусі і Турцыі, павышэнне кваліфікацыі навуковых кадраў шляхам вывучэння турэцкай мовы, а таксама пераклад твораў турэцкіх і беларускіх філосафаў, навукоўцаў на беларускую і турэцкую мовы.
Сумесны Беларуска-турэцкі даследчы цэнтр з’яўляецца структурным падраздзяленнем Інстытута філасофіі НАН Беларусі, у яго склад уваходзяць як беларускія, так і турэцкія даследчыкі. Цэнтр, такім чынам, служыць прасторай для тэарэтычнага і практычнага ўзаемадзеяння навукоўцаў дзвюх розных па паходжанні і сэнсавым напаўненні культур. Такое ўзаемадзеянне асабліва значнае, паколькі дазваляе выявіць агульныя каштоўнасныя і ідэйныя вектары ў гістарычным мінулым і культурнай сучаснасці дзвюх розных дзяржаў і народаў, якія супрацоўнічаюць. У цяперашні час Цэнтр засяроджаны на выкананні адной агульнай тэмы «Філасофская і духоўна-культурная спадчына Беларусі і Турцыі: гісторыя і сучаснасць». У рамках гэтай агульнай тэмы ў 2023 г. турэцкія даследчыкі рыхтуюць «Агляд асноўных дасягненняў турэцкай філасофіі», а іх беларускія калегі даследуюць «Уплыў беларуска-мусульманскай традыцыі на фарміраванне культурнай і нацыянальнай ідэнтычнасці».
Акрамя даследчай часткі праца Цэнтра прадугледжвае і адукацыйную, і папулярызатарскую функцыі. Так, на базе Цэнтра мяркуецца вывучэнне навукоўцамі НАН Беларусі турэцкай мовы, плануецца правядзенне разнастайных лекцый і майстар-класаў.
