НАН Беларусі прымае ўдзел у 6-й Кітайскай міжнароднай выставе імпарту (China International Import Expo), якая праходзіць з 5 па 10 лістапада ў Шанхаі ў выставачным комплексе, плошча якога складае 1,5 млн кв. метраў. Мерапрыемства праходзіць пры падтрымцы Міністэрства камерцыі КНР і Народнага ўрада г. Шанхая. Гэта самая маштабная выставачная падзея ў свеце, якая праводзіцца пад патранажам старшыні Кітайскай Народнай Рэспублікі Сі Цзіньпіна. Тэматычныя раздзелы выставы: прамысловае абсталяванне; высакаякаснае інтэлектуальнае абсталяванне; гандаль паслугамі; прадукты харчавання; бытавая электроніка і тэхніка; машынабудаванне і іншыя. У праграме выставы — дзелавыя мерапрыемствы, семінары, канферэнцыі, B2B мерапрыемствы, якія даюць удзельнікам магчымасць наладжвання дзелавых кантактаў.

НАН Беларусі прымае ўдзел у выставе ў рамках калектыўнай экспазіцыі сумесна з Міністэрствам адукацыі, ДКНТ і прадстаўляе звыш 20 найменняў акадэмічных навукова-тэхнічных распрацовак у выглядзе натурных узораў, макетаў, дзеючых мадэляў. Так, напрыклад, ДА НПЦ НАН Беларусі па матэрыялазнаўстве прадстаўляе графензмяшчальны матэрыял і вырабы на яго аснове. Фізіка-тэхнічны інстытут НАН Беларусі прадстаўляе тэхналогію і абсталяванне для нанясення кампазіцыйных нанапакрыццяў на аснове алмазападобнага вугляроду. Гэтая ўнікальная тэхналогія фізічнага і хімічнага асаджэння, якая не мае аналагаў у свеце, дазваляе атрымліваць шырокую гаму алмазападобных вугляродных матэрыялаў. Інстытут мяса-малочнай прамысловасці НАН Беларусі прадстаўляе тэхналогію па вытворчасці сухіх бактэрыяльных заквасак. Такія закваскі прызначаны для прамысловай вытворчасці тварагу, ёгурту, смятаны, сыру і інш. На выставе таксама прадстаўлены монакрышталі і аграненыя ювелірныя ўстаўкі са штучна вырашчанага смарагду (НПЦ НАН Беларусі па матэрыялазнаўстве). Падобныя монакрышталі вырабляюцца з марфалагічнымі асаблівасцямі, фізічнымі ўласцівасцямі і характарыстыкамі колеру, максімальна набліжанымі да натуральных каштоўных камянёў. Новыя распрацоўкі прадстаўляюць ААТ «Прыборабудаўнічы завод Оптрон» і гасразліковая доследная вытворчасць Інстытута біяарганічнай хіміі НАН Беларусі. Усяго ў рамках калектыўнай экспазіцыі прадстаўлена каля 40 навукова-тэхнічных распрацовак.