11 снежня 2023 года Прэзідыум НАН Беларусі падвёў вынікі конкурсу на саісканне прэмій для маладых вучоных НАН Беларусі 2023 года.
У адпаведнасці з Палажэннем аб прэміях для маладых вучоных Нацыянальнай акадэміі навук Беларусі, вырашана прысудзіць:
прэміі імя акадэміка Ж. І. Алфёрава для маладых вучоных Нацыянальнай акадэміі навук Беларусі 2023 года:
- Аляксандру Жалудкевічу, загадчыку лабараторыі ДНВА «Навукова-практычны цэнтр Нацыянальнай акадэміі навук Беларусі па матэрыялазнаўстве», кандыдату фізіка-матэматычных навук, дацэнту, — за цыкл работ «Распрацоўка тэхналогіі сінтэзу, комплекснае даследаванне фазавых ператварэнняў і фізічных уласцівасцей магнітных матэрыялаў на аснове складаных аксідаў пераходных металаў і кампазіцыйных нана-структур у мона- і полікрышталічным станах для элементнай базы цвёрдацельнай мікраэлектронікі»;
- Вераніцы Люшкевіч, навуковаму супрацоўніку ДНУ «Інстытут фізікі імя Б. І. Сцяпанава Нацыянальнай акадэміі навук Беларусі», — за цыкл работ «Распрацоўка і выкарыстанне плазменных метадаў мадыфікацыі насення, якія стымулююць рост, выжывальнасць і прадукцыйнасць раслін».
Лаўрэатамі прэміі імя акадэміка В. Ф. Купрэвіча для маладых вучоных НАН Беларусі 2023 года сталі:
- Кацярына Бурць, навуковы супрацоўнік ДНУ «Інстытут фізіка-арганічнай хіміі Нацыянальнай акадэміі навук Беларусі», кандыдат хімічных навук, — за цыкл работ «Новыя кампазіцыйныя мембраны для фармацэўтычнай, харчовай і цэлюлозна-папяровай галін прамысловасці»;
- Галіна Куркіна, старшы навуковы супрацоўнік РУП «Навукова-практычны цэнтр Нацыянальнай акадэміі навук Беларусі па земляробстве», кандыдат сельскагаспадарчых навук, — за цыкл работ «Эфектыўнасць фунгіцыдных пратручвальнікаў пры вырошчванні кукурузы на зерне»;
- Мажароўская Людміла, старшы навуковы супрацоўнік ДНУ «Інстытут лесу Нацыянальнай акадэміі навук Беларусі», кандыдат біялагічных навук, Ганна Сачак, навуковы супрацоўнік ДНУ «Інстытут лесу Нацыянальнай акадэміі навук Беларусі», — за цыкл работ «Вывучэнне механізмаў устойлівасці хвоі звычайнай на малекулярна-генетычным і біяхімічным узроўнях»;
- Мікіта Сядляр, навуковы супрацоўнік ДНУ «Інстытут генетыкі і цыталогіі Нацыянальнай акадэміі навук Беларусі», кандыдат біялагічных навук, – за цыкл работ «Ацэнка рызыкі невыношвання цяжарнасці на аснове малекулярна-генетычнага аналізу».
Прэмію імя акадэміка У. М. Ігнатоўскага для маладых вучоных Нацыянальнай акадэміі навук Беларусі 2023 года вырашана прысудзіць:
- Аляксандру Бельскаму, загадчыку цэнтра ДНУ «Інстытут сацыялогіі Нацыянальнай акадэміі навук Беларусі», кандыдату сацыялагічных навук, — за цыкл работ «Распрацоўка новых стратэгій сацыялагічнага даследавання для выяўлення, ацэнкі і процідзеяння дэструктыўным інфармацыйным укідам ва ўмовах трансфармацыі нацыянальнай медыяпрасторы і геапалітычнага “перафарматавання” па выніках комплекснага аналізу ўздзеяння традыцыйных і электронных СМІ на насельніцтва Рэспублікі Беларусь з мэтай фарміравання яго інфармацыйнай культуры».
Дыпломы лаўрэатам будуць уручаны ў рамках святкавання Дня беларускай навукі ў студзені 2024 года.
Прэміі для маладых вучоных НАН Беларусі заснаваны ў 2019 годзе з мэтай падтрымкі і заахвочвання таленавітых маладых вучоных, якія працуюць у арганізацыях НАН Беларусі, стымулявання іх творчай ініцыятывы, умацавання кадравага патэнцыялу, увекавечання памяці выдатных беларускіх вучоных і папулярызацыі ведаў аб гісторыі беларускай навукі.
Сістэма прэмій для маладых вучоных уключае тры імянныя прэміі:
- прэмію імя акадэміка Ж. І. Алфёрава — у галіне фізікі, матэматыкі, інфарматыкі, фізіка-тэхнічных і тэхнічных навук (колькасць прэмій, якія прысуджаюцца, — 2);
- прэмію імя акадэміка В. Ф. Купрэвіча — у галіне біялогіі, хіміі і навук аб Зямлі, медыцыны, аграрных навук (колькасць прэмій, якія прысуджаюцца, — 4);
- прэмію імя акадэміка У. М. Ігнатоўскага — у галіне гуманітарных і сацыяльных навук (колькасць прэмій, якія прысуджаюцца, — 2).
Усяго, паводле Палажэння, прысуджаецца 8 прэмій у памеры 15 базавых ставак кожная.