17 мая 2024 года на базе ДП «Інстытут біяхіміі біялагічна актыўных злучэнняў НАН Беларусі» (г. Гродна) адбыўся IV Беларускі біяхімічны кангрэс «Сучасныя праблемы біяхіміі і малекулярнай біялогіі». Мэта Кангрэса — ацэнка сучаснага стану фундаментальных даследаванняў у галіне біяхіміі і малекулярнай біялогіі, аналіз дасягнутых вынікаў і іх выкарыстання ў практычнай дзейнасці, вызначэнне напрамкаў далейшага развіцця з улікам сусветнага вопыту і патрэб напрамкаў эканомікі рэспублікі, пашырэнне міжнароднага супрацоўніцтва ў розных галінах біяхіміі, абмеркаванне і распрацоўка новых сумесных праграм і праектаў.

У працы Кангрэса прынялі ўдзел прадстаўнікі навуковых арганізацый, ВНУ, устаноў аховы здароўя Рэспублікі Беларусь, Расійскай Федэрацыі, Узбекістана, Туркменістана, Ірака, Сербіі, Турцыі, ЗША. З прывітальным словам на Кангрэсе выступіў акадэмік-сакратар Аддзялення медыцынскіх навук НАН Беларусі, доктар медыцынскіх навук, прафесар Васіль Богдан, які перадаў прывітанне ўдзельнікам Кангрэса ад Старшыні Прэзідыума НАН Беларусі Уладзіміра Гусакова; дырэктар Інстытута, кандыдат біялагічных навук, дацэнт Алег Кузняцоў; член-карэспандэнт НАН Беларусі Андрэй Майсяёнак. Даклады ўдзельнікаў Кангрэса былі прысвечаны найважнейшым вынікам навуковых даследаванняў і распрацовак у галіне біяхіміі, малекулярнай біялогіі, клінічнай біяхіміі, фармакалогіі, анкалогіі.

У рамках IV Беларускага біяхімічнага Кангрэса «Сучасныя праблемы біяхіміі і малекулярнай біялогіі» вядучаму навуковаму супрацоўніку ДП «Інстытут біяхіміі біялагічна актыўных злучэнняў НАН Беларусі», доктару біялагічных навук, прафесару Аляксандру Макарчыкаву прысуджана званне Ганаровага прафесара Інстытута.

Да працы кангрэса было прымеркавана выданне рэцэнзаванага навуковага часопіса «Біяхімія і малекулярная біялогія» і дадатак да яго.