Каля 50 арганізацый НАН Беларусі прымаюць удзел у Міжнароднай спецыялізаванай выставе «БЕЛАГРА-2024». Усяго навукоўцы і спецыялісты Акадэміі навук у закрытым павільёне (266 м. кв.) і на пляцоўцы (658 м. кв) дэманструюць звыш 300 інавацыйных распрацовак і тэхналогій для сельскай гаспадаркі.
Ва ўрачыстай цырымоніі адкрыцця выставы прыняў удзел намеснік Старшыні Прэзідыума НАН Беларусі Пётр Казакевіч.
Сёлета з інавацыйнымі прадуктамі і тэхналогіямі навукоўцаў можна будзе азнаёміцца ў наступных тэматычных блоках: «Разумная сельская гаспадарка», «Біятэхналогіі», «Экалагічна чыстыя ўгнаенні», «Лічбавыя рашэнні для аграрнага сектара», «Харчовая бяспека» і «Сельскагаспадарчая тэхніка».
Экспазіцыя РУП «НПЦ НАН Беларусі па механізацыі сельскай гаспадаркі» будзе традыцыйна прадстаўлена новымі машынамі, абсталяваннем і прыборамі для тэхнічнага забеспячэння інавацыйных тэхналогій аграпрамысловага комплексу. Так, мабільная рабатызаваная платформа прызначана для маніторынгу стану і догляду пасадак сельскагаспадарчых культур. Падштурхоўвальнік корму напаўнавясны ПКП-0,9 распрацаваны для падштурхоўвання грубых кармоў (сена, салома, сілас, сянаж) і кармасумесей бліжэй да кармавога стала жывёл. Агрэгат для механічнага выдалення кроны ягадных кустоў АВК-1 (АУК-1). Тэхніка прызначана для механічнага выдалення кроны нізкапрадукцыйных ягадных кустоў, якія выкарыстоўваюцца ў сістэме механізаванага вырошчвання ягадных насаджэнняў. Сярод навінак — падборшчык валунных камянёў ПВК-1 (для падбору і транспарціроўкі валунных камянёў); плуг абаротны навясны з змяняльным цэнтрам мас; раскідвальнікі пяску навясныя ПН; апырсквальнік двухрадковы для ягаднікаў АД-2 (ОД-2) і інш.
РУП «Навукова-практычны цэнтр НАН Беларусі па земляробстве» прадстаўляе сваю экспазіцыю пад дэвізам «Сарты новага пакалення — Году якасці». Гэта — насенне новых сартоў асноўных сельскагаспадарчых культур, створаных навукоўцамі-аграрыямі на базе цэнтра, з высокім патэнцыялам прадукцыйнасці і ўраджайнасці, раянаваных на 2023—2024 гг.: пшаніца азімая Ілві, Грэя, Стася, Лея; пшаніца яравая Знамя, Стася; жыта Уліса, Жалейка; трыцікале азімае Авеню, Экватар, Барэц; трыцікале яравое Дзела, ячмень яравы Літвін, Фанцік: авёс Зеніт; грэчка Дзея, Дзеліва; гарох палявы Стымул; рапс азімы Кардынал, Раднік; рапс яравы Геліус і інш.
Кітайска-беларускае сумеснае закрытае акцыянернае таварыства «Авіяцыйныя тэхналогіі і комплексы» (ЗАТ «АТК») паказвае авіямадэль мультыротарнага тыпу «Аградрон А60-Х», прызначаную для ўнясення сродкаў аховы раслін па тэхналогіі ультрамалааб’ёмнага апырсквання.
РУП «Інстытут мяса-малочнай прамысловасці» дэманструе распрацаваны асартымент групы спецыялізаваных нізкалактозных і безлактозных малочных прадуктаў для харчавання людзей з лактознай недастатковасцю. Тэхналогія вытворчасці дазволіць выключыць з’яўленне залішняй салодкасці гатовага прадукту за кошт больш нізкай колькасці рэдукуючых цукраў.
Дзяржаўнае прадпрыемства «Цэнтр святлодыёдных і оптаэлектронных тэхналогій НАН Беларусі» дэманструе святлодыёднае электраасвятленне для агародніцтва закрытага грунту.
Сярод найбольш актуальных распрацовак НАН Беларусі на выставе: лічбавая ідэнтыфікацыя і прасочвальнасць тавараў у ланцугах паставак і бяспекі прадукцыі; прадукты харчавання для дзяцей на плодаагародніннай, мясной і малочнай асновах; ветэрынарныя прэпараты, рэгулятары росту раслін, інавацыйныя ўгнаенні і многае іншае.
Міжнародная спецыялізаваная выстава «БЕЛАГРА-2024» праходзіць 4–9 чэрвеня 2024 года ў Кітайска-беларускім індустрыяльным парку «Вялікі камень».
