12 чэрвеня 2024 г. у Інстытуце філасофіі НАН Беларусі адбылося падпісанне Дагавора аб супрацоўніцтве ў галіне навуковай і адукацыйнай дзейнасці паміж Інстытутам філасофіі НАН Беларусі і Інстытутам філасофіі, права і сацыяльна-палітычных даследаванняў імя А. А. Алтмышбаева НАН Кыргызскай Рэспублікі.

Дагаворам прадугледжана ўзаемадзеянне вучоных па наступных напрамках: распрацоўка сумесных навукова-даследчых праектаў, стварэнне калектыўных навуковых прац, абмеркаванне актуальных філасофскіх тэарэтыка-метадалагічных пытанняў сучаснага этапу развіцця навукі і грамадства з дапамогай правядзення навуковых канферэнцый і круглых сталоў, навуковы абмен, публікацыі вядучых і маладых вучоных.

Падпісанне дагавора прайшло ў рамках Міжнароднага семінара «Традыцыі і перспектывы філасофска-метадалагічных і трансдысцыплінарных даследаванняў у Рэспубліцы Беларусь і Кыргызскай Рэспубліцы». Мэтай семінара было выяўленне ўкладу акадэмічнай філасофска-метадалагічнай школы акадэміка Д. І. Шыраканава ў станаўленне і развіццё філасофска-метадалагічных і міждысцыплінарных даследаванняў у Кыргызскай Рэспубліцы і Рэспубліцы Беларусь і абмеркаванне перспектыў міжнароднага супрацоўніцтва паміж Інстытутам філасофіі, права і сацыяльна-палітычных даследаванняў імя А. А. Алтмышбаева НАН Кыргызскай Рэспублікі і Інстытутам філасофіі НАН Беларусі.

Дырэктар Інстытута філасофіі НАН Беларусі Анатоль Лазарэвіч падкрэсліў вялікую значнасць аднаўлення навуковых кантактаў і развіцця міжнароднага супрацоўніцтва беларускіх і кыргызскіх вучоных. Ён азнаёміў замежных калег з асноўнымі напрамкамі навуковых даследаванняў, якія праводзяцца ў Інстытуце філасофіі, і перспектыўнымі праектамі, у рамках якіх магчыма супрацоўніцтва.