18 ліпеня 2024 г. у ДНУ «Інстытут гісторыі Нацыянальнай акадэміі навук Беларусі» адбыўся круглы стол «Інстытут прэзідэнцкай улады ва ўмацаванні беларускай дзяржаўнасці і нацыянальнай бяспекі (да 30-годдзя інстытута прэзідэнцтва ў Рэспубліцы Беларусь)». З прывітальным словам выступіў Старшыня Прэзідыума НАН Уладзімір Гусакоў. Уладзімір Рыгоравіч падкрэсліў, што 30-годдзе інстытута прэзідэнцтва ў Беларусі — знакавая падзея і знакавая дата. «Інстытут прэзідэнцкай улады трывала ўвайшоў у палітычную сістэму нашай краіны, стаў найважнейшай часткай беларускай дзяржаўнасці і нацыянальнай бяспекі. Нам ёсць чым ганарыцца, а беларусам ёсць што сказаць пра дасягненні апошняга трыццацігоддзя. Яны відавочныя ва ўсім», — адзначыў Уладзімір Гусакоў.

У ходзе круглага стала навукоўцы абмеркавалі такія праблемы, як: найважнейшыя этапы развіцця інстытута прэзідэнцкай улады ў Рэспубліцы Беларусь; інстытут прэзідэнцкай улады ва ўмацаванні нацыянальнай бяспекі Беларусі; інстытут прэзідэнцкай улады — важны фактар умацавання і развіцця нацыянальнай дзяржаўнасці Беларусі; умацаванне і развіццё народаўладдзя ў Рэспубліцы Беларусь.

Удзельнікі круглага стала азнаёміліся з навуковымі і практычнымі дасягненнямі ў галіне вывучэння палітычнай гісторыі суверэннай Беларусі, а таксама абмеркавалі ўзаемадзеянне акадэмічнай і ўніверсітэцкай навукі па актуальных праблемах вывучэння палітычнай гісторыі суверэннай Беларусі.

Таксама ў рамках круглага стала дэманстравалася выстава навуковых і навукова-папулярных выданняў, прымеркаваная да 30-годдзя інстытута прэзідэнцтва ў Рэспубліцы Беларусь «Акадэмічная гуманітарыстыка. Уклад навукоўцаў ва ўмацаванне беларускай дзяржаўнасці».

У працы круглага стала прынялі ўдзел вядучыя навукоўцы, грамадскія і палітычныя дзеячы, прадстаўнікі сродкаў масавай інфармацыі.