27–30 жніўня дэлегацыя НАН Беларусі прыняла ўдзел у мерапрыемствах XI Міжнароднага форуму тэхналагічнага развіцця «Тэхнапрам-2024» (г. Новасібірск).
Напярэдадні адкрыцця форуму «Тэхнапрам-2024» адбылася рабочая сустрэча кіраўнікоў і спецыялістаў РАН, Сібірскага аддзялення РАН і Нацыянальнай акадэміі навук Рэспублікі Беларусь. Былі абмеркаваны пытанні па выкананні Дарожнай карты супрацоўніцтва паміж НАН Беларусі і СА РАН на 2023–2025 гг., узаемадзеяння ў рамках мегасаенс праекта «СКІФ». Старшыня СА РАН акадэмік Валянцін Мікалаевіч Пармон падкрэсліў значнасць «Тэхнапрама» як пляцоўкі, якая аб’ядноўвае прадстаўнікоў навукі, перш за ўсё прыкладной, адукацыі і высокатэхналагічнай прамысловасці. У час сустрэчы акадэмік-сакратар Аддзялення фізіка-тэхнічных навук НАН Беларусі Сяргей Шчарбакоў выказаў гатоўнасць беларускіх навуковых калектываў працаваць у рамках нацпраектаў РФ. У гэтым кантэксце Сяргей Шчарбакоў інфармаваў пра афіцыйна аформлены намер НАН Беларусі ўдзельнічаць у расійскай Праграме развіцця сінхратронных і нейтронных даследаванняў з дапамогай сумесных эксперыментаў на ўстаноўках класа мегасаенс, якія ўводзяцца ў эксплуатацыю: СКІФ у новасібірскім навукагорадзе Кальцова і ПІК у Гатчыне пад Санкт-Пецярбургам. Акадэмік-сакратар Аддзялення фізікі, матэматыкі і інфарматыкі НАНБ Аляксандр Генадзьевіч Шумілін паведаміў, што ў рамках Саюзнай дзяржавы Расіі і Беларусі прынята Стратэгія навукова-тэхналагічнага развіцця, дзе з беларускага боку галаўной арганізацыяй вызначана НАНБ, з расійскага — Нацыянальны даследчы цэнтр «Курчатаўскі інстытут». «Гэта аўтарытэтная, буйная арганізацыя, — адзначыў А. Шумілін, — але яна не прадстаўляе ўсю расійскую навуку. Быў бы вельмі карысны ўдзел Расійскай акадэміі навук і яе структур». Акадэмік-сакратар Аддзялення хіміі і навук аб Зямлі НАНБ Аляксей Валянцінавіч Труханаў выступіў з ідэяй стварэння расійска-беларускага «наднацыянальнага навуковага органа», здольнага фінансаваць і каардынаваць усе сумесныя даследаванні. «У нас адзіная эканоміка, адзіны рынак, павінна быць і адзіная навука», — лічыць А. Труханаў.
27 жніўня ў рамках XI Міжнароднага форуму тэхналагічнага развіцця «Тэхнапрам-2024» адбыўся круглы стол «Партнёры па навукова-тэхналагічным развіцці: досвед супрацоўніцтва з краінамі БРІКС і СНД». Пра досвед міжнароднага супрацоўніцтва ў галіне распрацоўкі функцыянальных матэрыялаў паведаміў акадэмік-сакратар Нацыянальнай акадэміі навук Беларусі Аляксей Труханаў.
У першы дзень працы XI Міжнароднага форуму тэхналагічнага развіцця «Тэхнапрам-2024» вялікую цікавасць выклікала экспазіцыя НАН Беларусі. ЗВЧ-элементы, прэцызійныя фоташаблоны, датчыкі, юсціровачныя платы, метэаблок і ўзоры. Падпісаны дагавор, які сімвалізуе пачатак паўнавартаснага супрацоўніцтва паміж НАН Беларусі і Сібірскім аддзяленнем РАН. Падпісаны дагавор паміж ААТ Мінскі НДІ радыёматэрыялаў (прадпрыемства Аддзялення фізікі, матэматыкі і інфарматыкі НАН Беларусі) і Інстытутам аўтаматыкі і электраметрыі Сібірскага аддзялення Расійскай акадэміі навук на выкананне НДВКП. Члены дэлегацыі наведалі інстытуты СА РАН у г. Новасібірску і г. Іркуцку.
XI Міжнародны форум тэхналагічнага развіцця «Тэхнапрам-2024» прайшоў з 27 па 30 жніўня ў Новасібірску. Сёлета ключавой тэмай «Тэхнапраму» стала «Навука і тэхналогіі – аснова сацыяльна-эканамічнага і прасторавага развіцця Расіі». За 4 дні працы форуму былі адзначаны найлепшыя практыкі трансферу тэхналогій у рэальны сектар эканомікі, прэзентаваны комплексныя дзяржаўныя рэгіянальныя праграмы НТР, а таксама прадстаўлены ўнікальныя навуковыя распрацоўкі.
