Прэзідыум НАН Беларусі падвёў вынікі конкурсу на саісканне прэмій для маладых вучоных НАН Беларусі 2024 года. Лаўрэатамі сталі 12 маладых вучоных.

У адпаведнасці з Палажэннем аб прэміях для маладых вучоных Нацыянальнай акадэміі навук Беларусі вырашана прысудзіць:

прэміі імя акадэміка Ж. І. Алфёрава для маладых вучоных Нацыянальнай акадэміі навук Беларусі 2024 года:

Яўгеніі Зяноўка, малодшаму навуковаму супрацоўніку ДНУ «Аб’яднаны інстытут праблем інфарматыкі НАН Беларусі», Андрэю Бакуновічу, малодшаму навуковаму супрацоўніку ДНУ «Аб’яднаны інстытут праблем інфарматыкі НАН Беларусі», Віталю Хахлову, інжынеру-праграмісту ДНУ «Аб'яднаны інстытут праблем інфарматыкі НАН Беларусі», – за  цыкл работ «Распрацоўка агульнай інтэрактыўнай “Платформы штучнага інтэлекту BELAI.BY” і платформы “Галасавы AI-асістэнт» з сістэмамі пытанняў і адказаў, з якімі можна размаўляць голасам і тэкстам»;

Міхаілу Кавалько, намесніку начальніка аддзела ДНУ «Фізіка-тэхнічны інстытут НАН Беларусі», кандыдату тэхнічных навук, – за цыкл работ «Жалезавугляродзістыя сплавы з аўсферытнай і аўсферытна-карбіднай структурай матрыцы для вырабаў, якія спалучаюць у сабе высокую трываласць, вязкасць і зносаўстойлівасць»;

прэміі імя акадэміка В. Ф. Купрэвіча для маладых вучоных Нацыянальнай акадэміі навук Беларусі 2024 года:

Ганне-Марыі Ерафеевай, навуковаму супрацоўніку ДНУ «Інстытут фізіялогіі НАН Беларусі», – за цыкл работ «Удзел канабіноідных рэцэптараў у анальгетычным і пратэктарным дзеянні мезенхімальных ствалавых клетак ва ўмовах нейрапатычнага болю»;

Паліне Лабаноўскай, навуковаму супрацоўніку ДНВА «Навукова-практычны цэнтр НАН Беларусі па біярэсурсах», Арсенію Валністаму, навуковаму супрацоўніку ДНВА «Навукова-практычны цэнтр НАН Беларусі па біярэсурсах», Уладзіславу Молчану, навуковаму супрацоўніку ДНВА «Навукова-практычны цэнтр НАН Беларусі па біярэсурсах», – за цыкл работ «Ацэнка папуляцыйных генафондаў і маніторынг паразітарных пагроз у дзікіх жывёл Беларусі»;

Аляксандру Шарэнку, загадчыку сектара РНУП «Інстытут сістэмных даследаванняў у АПК НАН Беларусі», – за цыкл работ «Удасканаленне механізмаў стымулявання развіцця рэгіянальнай эканомікі аграпрамысловага комплексу Рэспублікі Беларусь»;

Кацярыне Шмыга, загадчыку сумеснай беларуска-кітайскай лабараторыі ДНВА «Хімічны сінтэз і біятэхналогіі», – за цыкл работ «Біяхімічныя, генетычныя і тэхналагічныя асновы стварэння комплекснага мікробнага прэпарату для павышэння прадукцыйнасці збожжавых культур»;

прэмію імя акадэміка У. М. Ігнатоўскага для маладых вучоных Нацыянальнай акадэміі навук Беларусі 2024 года:

Дзмітрыю Крэнту, навуковаму супрацоўніку дзяржаўнай установы «Цэнтральная навуковая бібліятэка імя Якуба Коласа Нацыянальнай акадэміі навук Беларусі», – за цыкл работ «Гісторыя акадэмічнай навукі Беларусі ў ХХ стагоддзі»;

Аляксандры Нічыпаровіч, навуковаму супрацоўніку ДНУ «Цэнтр даследаванняў беларускай культуры, мовы і літаратуры НАН Беларусі», кандыдату мастацтвазнаўства, – за цыкл работ «Сучасная архітэктура ў гістарычным асяроддзі гарадоў Беларусі ў кантэксце тэндэнцый сусветнай праектнай практыкі».

 Прэміі для маладых вучоных НАН Беларусі заснаваны ў 2019 годзе з мэтай падтрымкі і заахвочвання таленавітых маладых вучоных, якія працуюць у арганізацыях НАН Беларусі, стымулявання іх творчай ініцыятывы, умацавання кадравага патэнцыялу, увекавечання памяці выдатных беларускіх вучоных і папулярызацыі ведаў аб гісторыі беларускай навукі.

Сістэма прэмій для маладых вучоных уключае тры імянныя прэміі:

прэмію імя акадэміка Ж. І. Алфёрава — у галіне фізікі, матэматыкі, інфарматыкі, фізіка-тэхнічных і тэхнічных навук (колькасць прэмій, якія прысуджаюцца, – 2);

прэмію імя акадэміка В. Ф. Купрэвіча — у галіне біялогіі, хіміі і навук аб Зямлі, медыцыны, аграрных навук (колькасць прэмій, якія прысуджаюцца, – 4);

прэмію імя акадэміка У. М. Ігнатоўскага — у галіне гуманітарных і сацыяльных навук (колькасць прэмій, якія прысуджаюцца, – 2).

Усяго, паводле Палажэння, прысуджаецца 8 прэмій памерам 15 базавых ставак кожная.