29 студзеня 2025 года Старшыня Прэзідыума НАН Беларусі Уладзімір Гусакоў сустрэўся з удзельнікам міжнароднага праекта SIRIUS-23, навуковым супрацоўнікам Інстытута фізіка-арганічнай хіміі НАН Беларусі Вольгай Масціцкай. Вольга распавяла пра свой удзел у дадзеным праекце і прадставіла вынікі эксперыментаў, якія яна праводзіла ў рамках SIRIUS-23, а таксама адказала на шматлікія пытанні маладых навукоўцаў, якія прысутнічалі на сустрэчы.
Старшыня Прэзідыума НАН Беларусі Уладзімір Гусакоў высока ацаніў работу Вольгі Масціцкай і адзначыў, што ўдзел у праекце SIRIUS-23 вельмі важны для Нацыянальнай акадэміі навук. «Беларусь – паўнавартасны ўдзельнік асваення космасу. У Акадэміі навук ёсць праекты па асваенні касмічнай прасторы ў мірных мэтах з многімі краінамі. Мы гатовыя ўдзельнічаць ва ўсіх праектах па касмічных даследаваннях», – падкрэсліў Уладзімір Гусакоў.
Старшыня Прэзідыума НАН Беларусі Уладзімір Гусакоў уручыў нагрудны знак апарата НАН Беларусі «Вялікі медаль Нацыянальнай акадэміі навук Беларусі» Вользе Масціцкай, навуковаму супрацоўніку Інстытута фізіка-арганічнай хіміі НАН Беларусі. Высокай узнагароды Вольга ўдастоена за паспяховы ўдзел у працяглым міжнародным ізаляцыйным навуковым эксперыменце «SIRIUS-23» і плённую работу па прадстаўленні дасягненняў НАН Беларусі.
Міжнародны праект SIRIUS праводзіўся з 14 лістапада 2023 г. па 14 лістапада 2024 г. на базе Інстытута медыка-біялагічных праблем РАН і ўключаў серыю ізаляцыйных эксперыментаў па імітацыі далёкіх касмічных палётаў. Шасцёра ўдзельнікаў праекта SIRIUS-23 адправіліся ў гадавы «палёт» пасля таго, як быў зачынены люк эксперыментальнай устаноўкі інстытута. У навуковую праграму ўвайшлі эксперыменты навукоўцаў з Рэспублікі Беларусь. Вольга Масціцкая адказвала за выкананне эксперыментаў з удзелам беларускіх навукоўцаў. У праграму Вольгі Масціцкай уваходзіла больш за 60 даследаванняў. У гэтых даследаваннях прымалі ўдзел навукоўцы з Інстытута мяса-малочнай прамысловасці НАН Беларусі, Інстытута мікрабіялогіі НАН Беларусі, Навукова-практычнага цэнтра НАН Беларусі па жывёлагадоўлі, Інстытута эксперыментальнай батанікі, Інстытута фізіялогіі.
Даведачна: Міжнародны праект SIRIUS (Scientific International Research In Unique Terrestrial Station) праводзіцца на базе Інстытута медыка-біялагічных праблем РАН і ўключае серыю ізаляцыйных эксперыментаў па імітацыі касмічных палётаў. Мэтай праекта з'яўляюцца даследаванні па псіхалогіі і працаздольнасці чалавека ва ўмовах ізаляцыі павялічанай працягласці ў мэтах падтрымання будучых даследаванняў на Міжнароднай касмічнай станцыі, а таксама змяншэння рызык у перспектыўных касмічных даследчых місіях.
