У НАН Беларусі адбылося пасяджэнне рабочай групы па распрацоўцы законапраекта аб штучным інтэлекце
26 сакавіка 2025 года ў НАН Беларусі пад кіраўніцтвам Старшыні Прэзідыума НАН Беларусі Уладзіміра Гусакова адбылося пасяджэнне рабочай групы па распрацоўцы законапраекта аб штучным інтэлекце. Эксперты абмеркавалі ключавыя пытанні развіцця ШІ і заканадаўчага рэгулявання.
Уладзімір Гусакоў, адкрываючы пасяджэнне, адзначыў: «Мы стаім на парозе незлічоных магчымасцяў штучнага інтэлекту. І таму гэтая сфера мае патрэбу ў заканадаўчым рэгуляванні – з улікам як рызык і пагроз, так і каласальных пераваг ШІ». Кіраўнік НАН Беларусі адзначыў, што ўжо ў рамках СНД адпрацоўваецца адпаведны мадэльны закон. Неабходны ён і непасрэдна для Беларусі: «Закон вельмі неабходны для рэгулявання ўсіх адносін. Паколькі ў гэтай сферы ўжо праяўляе сябе кіберзлачыннасць, ёсць і іншыя праявы. Перакананы, закон павінен матываваць і стымуляваць развіццё штучнага інтэлекту. Гаворка і пра прымяненне штучнага інтэлекту ў цэлым шэрагу галін. Мы павінны гаварыць і пра рызыкі і пагрозы, і пра каласальныя перавагі, якія нясе нам ШІ. Па сутнасці, мы сёння стаім на парозе незлічоных магчымасцяў штучнага інтэлекту».
На пасяджэнні рабочай групы па распрацоўцы законапраекта аб штучным інтэлекце быў абмеркаваны шэраг важных пытанняў. Аб развіцці тэхналогій ШІ у Беларусі далажыў Сяргей Круглікаў, генеральны дырэктар АІПІ НАН Беларусі. Аб рабоце над праектам мадэльнага закона «Аб тэхналогіях штучнага інтэлекту» расказаў Сяргей Касанін, намеснік генеральнага дырэктара па навуковай рабоце АІПІ НАН Беларусі. Вопыт Сбербанка ў развіцці ШІ-праектаў прадставіла Аляксандра Русецкая, выканаўчы дырэктар ААТ «Сбер Банк». З прапановамі па распрацоўцы законапраекта выступілі Сяргей Круглікаў і члены рабочай групы. Работа над законапраектам будзе працягнута.
