Абраны новы склад Савета маладых вучоных НАН Беларусі
Новы склад Савета маладых вучоных НАН Беларусі абраны на справаздачна-выбарным агульным сходзе Савета маладых вучоных 3 красавіка 2025 года. У мерапрыемстве, якое ў такім фармаце праходзіць раз у тры гады, прынялі ўдзел прадстаўнікі Саветаў маладых вучоных Аддзяленняў акадэміі (адзін дэлегат – ад 25 маладых даследчыкаў), акадэмікі-сакратары, кіраўніцтва Акадэміі навук. Напярэдадні ва ўсіх аддзяленнях прайшлі справаздачныя сходы Саветаў маладых вучоных.
Аб выніках дзейнасці СМВ за мінулы год далажыў старшыня Станіслаў Юрэцкі. Аб дзейнасці Саветаў СМВ аддзяленняў распавялі старшыні. На справаздачна-выбарным агульным сходзе СМВ зацверджана справаздача аб выніках дзейнасці Савета маладых вучоных за 2024 год. Аб выніках сацыялагічнага даследавання сярод маладых навукоўцаў Акадэміі навук распавёў Мікалай Сухоцкі, намеснік дырэктара Інстытута сацыялогіі.
На справаздачна-выбарным Агульным сходзе СМВ адбыліся выбары старшыні Савета маладых вучоных НАН Беларусі. У выніку адкрытага галасавання старшынёй Савета маладых вучоных НАН Беларусі абраны Максім Кучвальскі, кандыдат біялагічных навук. Намеснікамі старшыні сталі Ягор Гусакоў і Антон Ананчыкаў. Марына Лебядзевіч – вучоны сакратар.
На справаздачна-выбарным Агульным сходзе СМВ знайшла падтрымку патрыятычная акцыя «Я памятаю! Я ганаруся!», прысвечаная 80-годдзю Вялікай Перамогі. Сёлета плануецца і правядзенне конкурсу на лепшую навуковую публікацыю сярод маладых вучоных. На справаздачна-выбарным Агульным сходзе СМВ НАН Беларусі лепшым маладым вучоным былі ўручаны ўзнагароды НАН Беларусі, Беларускага рэспубліканскага фонду фундаментальных даследаванняў, прафсаюзнай арганізацыі, Беларускага саюза жанчын, Савета маладых вучоных НАН Беларусі.
Звяртаючыся да маладых вучоных, Старшыня Прэзідыума НАН Беларусі Уладзімір Гусакоў адзначыў, што кіраўніцтва НАН Беларусі ўскладае на моладзь вялікія надзеі. «Сёння важна, каб маладыя навукоўцы былі ў першую чаргу патрыётамі, сапраўднымі грамадзянамі нашай краіны. І для вас галоўная задача – навуковая дзейнасць, высокія вынікі і дасягненні. Мы ўскладаем на моладзь вялікія надзеі. Падтрымка маладых навукоўцаў заўсёды з'яўлялася і з'яўляецца прыярытэтам у дзейнасці Нацыянальнай акадэміі навук. Мы гатовы разглядаць і падтрымліваць усе маладзёжныя ідэі, ініцыятывы і прапановы. Маладыя навукоўцы сёння павінны смела і актыўна брацца за вырашэнне самых складаных навуковых задач. І вы ва ўсім знойдзеце разуменне і падтрымку», – сказаў Старшыня Прэзідыума НАН Беларусі Уладзімір Гусакоў. Кіраўніцтва Акадэміі навук прапанавала моладзі актыўна ўключыцца ў рэалізацыю самых значных праектаў НАН Беларусі па прыярытэтных накірунках развіцця сусветнай навукі.
У цяперашні час Савет маладых вучоных НАН Беларусі аб'ядноўвае больш за 2 тысячы маладых вучоных. Толькі за мінулы год на працу ў арганізацыі Акадэміі навук прынята больш за 350 маладых даследчыкаў.
Бюро Савета маладых вучоных НАН Беларусі:
Максім Кучвальскі – старшыня СМВ НАН Беларусі;
Ягор Гусакоў – намеснік старшыні СМВ НАН Беларусі;
Антон Ананчыкаў – намеснік старшыні СМВ НАН Беларусі, старшыня СМВ Аддзялення фізіка-тэхнічных навук;
Марына Лебядзевіч – вучоны сакратар, старшыня СМВ Аддзялення гуманітарных навук і мастацтваў;
Аляксандр Шарэнка – старшыня СМВ Аддзялення аграрных навук;
Яўген Шавалда – старшыня СМВ Аддзялення біялагічных навук;
Іван Кузьмянко – старшыня СМВ Аддзялення медыцынскіх навук;
Дар'я Васілеўская – старшыня СМВ Аддзялення фізікі, матэматыкі і інфарматыкі;
Анастасія Дзікая – старшыня СМВ Аддзялення хіміі і навук аб Зямлі.
