НАН Беларусі аб'яўляе маладзёжны конкурс навуковых і творчых работ «Навука будучыні», прысвечаны Году добраўпарадкавання
Нацыянальная акадэмія навук Беларусі аб'яўляе маладзёжны конкурс навуковых і творчых работ «Навука будучыні», прысвечаны Году добраўпарадкавання пяцігодкі якасці. Такое рашэнне прынята Бюро Прэзідыума НАН Беларусі.
Конкурс праводзіцца ў мэтах павышэння прэстыжу навуковай дзейнасці, развіцця творчай актыўнасці, стымулявання цікавасці да навуковай творчасці і прыцягнення моладзі ў навуку, фарміравання ў грамадстве адказнасці за вынікі сваёй працы і пачуцці датычнасці да будучыні краіны.
Да ўдзелу ў Конкурсе запрашаецца школьная, студэнцкая і рабочая моладзь, прадстаўнікі творчых прафесій, магістранты, аспіранты, маладыя навукоўцы.
Конкурс «Навука будучыні» праводзіцца НАН Беларусі ў 2025 годзе па дзевяці намінацыях: «Iнавацыі добраўпарадкавання гарадоў, раённых цэнтраў, пасёлкаў і вёсак Беларусі»; «Будучыня за якасцю: інавацыі і творчасць моладзі»; «Фізіка, матэматыка і інфарматыка»; «Эксперыментальная біялогія. Экалогія, захаванне біяразнастайнасці»; «Фізіка-тэхнічныя інавацыі»; «Хімія і прыродакарыстанне»; «Медыцына будучыні»; «Гуманітарныя веды і творчасць у XXI стагоддзі»; «Iнавацыі ў АПК».
У кожнай з намінацый Конкурс праводзіцца па трох катэгорыях:
катэгорыя 1 – школьнікі і студэнты; катэгорыя 2 – магістранты, аспіранты; катэгорыя 3 – рабочая, творчая моладзь (да 31 года па стане на 1 студзеня конкурснага года). У кожнай з катэгорый уручаюцца дыпломы I, II і III ступені.
Удзельнікамі конкурсу могуць быць як асобныя грамадзяне, так і аўтарскія калектывы ў складзе не больш за тры чалавекі.
На Конкурс прадстаўляюцца апублікаваныя і неапублікаваныя работы ў форме артыкулаў (цыкла артыкулаў), распрацоўкі, якія валодаюць інавацыйнасцю, сацыяльна-эканамічнай значнасцю, а таксама макеты, мадэлі, устаноўкі, апараты, механізмы, вырабы і іншыя магчымыя формы, узоры, навуковыя даклады, прэзентацыі, эсэ і інш. Кожны суіскальнік можа прадстаўляць для ўдзелу ў Конкурсе толькі адну работу па адной з намінацый.
Заяўка на ўдзел у Конкурсе адпраўляецца шляхам запаўнення адпаведнай рэгістрацыйнай формы на афіцыйным сайце Нацыянальнай акадэміі навук Беларусі да 1 кастрычніка конкурснага года. Астатнія матэрыялы накіроўваюцца поштай з пазнакай «Маладзёжны конкурс навуковых і творчых работ «Навука будучыні» ў адным экзэмпляры да 1 кастрычніка конкурснага года па адрасе 220072, г. Мінск, праспект Незалежнасці, 66. Дапускаецца накіраванне заяўкі ў папяровым выглядзе (па форме згодна з дадаткам) разам з матэрыяламі вылучэння ў выпадку тэхнічнай немагчымасці запаўнення рэгістрацыйнай формы.
Спасылка на рэгістрацыйную форму прыёму заявак на ўдзел у маладзёжным конкурсе навуковых і творчых работ «Навука будучыні» – https://bit.ly/naukabud.
ПАЛАЖЭННЕ аб маладзёжным конкурсе навуковых і творчых работ «Навука будучыні».
