Акадэмія навук і Белнафтахім абмеркавалі перспектывы супрацоўніцтва ў нафтахімічнай сферы
У Акадэміі навук сёння адбылася рабочая сустрэча намесніка Старшыні Прэзідыума НАН Беларусі Аляксея Труханава з намеснікам старшыні канцэрна «Белнафтахім» Андрэем Баярыным, на якой абмяркоўваліся пытанні двухбаковага супрацоўніцтва і ўзаемадзеяння ў нафтахімічнай сферы.
У ходзе сустрэчы бакі абмеркавалі канкрэтныя тэмы супрацоўніцтва і праект плана-графіка рэалізацыі сумесных ініцыятыў на бягучую пяцігодку. Асаблівая ўвага была ўдзелена ўмацаванню партнёрскіх сувязяў паміж акадэмічнымі навуковымі ўстановамі і высокатэхналагічнымі прадпрыемствамі нафтахімічнага комплексу краіны.
«Акадэмія навук валодае магутным навуковым і кадравым патэнцыялам і мае адпаведныя кампетэнцыі. Мы гатовыя прапанаваць канцэрну свае перадавыя распрацоўкі ў галіне новых матэрыялаў, тэхналогій перапрацоўкі сыравіны і экалагічнай бяспекі вытворчасці», – падкрэсліў Аляксей Труханаў. Ён таксама адзначыў, што для павышэння канкурэнтаздольнасці беларускай нафтахімічнай прадукцыі на сусветным рынку неабходна больш шчыльнае ўзаемадзеянне і сінэргія намаганняў акадэмічнай навукі і нафтахімічнай прамысловасці.
У сустрэчы ўдзельнічалі прадстаўнікі НАН Беларусі і канцэрна «Белнафтахім», а таксама Інстытута фізіка-арганічнай хіміі, Інстытута хіміі новых матэрыялаў, Інстытута агульнай і неарганічнай хіміі, Інстытута энергетыкі, Аб'яднанага інстытута праблем інфарматыкі, фізіка-тэхнічнага інстытута, ААТ «Гродна Азот» і ААТ «Лакафарба».
