У НАН Беларусі сёння адкрылася III Міжнародная канферэнцыя «Лазеры, паўправадніковыя выпраменьвальнікі і сістэмы на іх аснове»
У Нацыянальнай акадэміі навук Беларусі сёння адкрылася III Міжнародная канферэнцыя «Лазеры, паўправадніковыя выпраменьвальнікі і сістэмы на іх аснове». У яе рабоце ўдзельнічае каля ста навукоўцаў і даследчыкаў з Беларусі, Расіі, Азербайджана, Манголіі і Кітая.
З прывітальным словам да гасцей і ўдзельнікаў канферэнцыі звярнуўся акадэмік-сакратар аддзялення фізікі, матэматыкі і інфарматыкі НАН Беларусі Аляксандр Шумілін. Ён падкрэсліў, што дадзенае мерапрыемства з'яўляецца важнай пляцоўкай для абмену перадавымі ведамі і вынікамі даследаванняў у галіне лазернай фізікі і паўправадніковых тэхналогій.
«Лазерныя тэхналогіі ў апошні час адыгрываюць усё больш значную ролю ў сучасным навукова-тэхнічным прагрэсе і знаходзяць усё больш шырокае прымяненне ў розных галінах прамысловасці, медыцыны, сувязі і абароны. Развіццё паўправадніковых выпраменьвальнікаў і сістэм на іх аснове адкрывае новыя гарызонты для інавацый і высокатэхналагічных распрацовак», – сказаў Аляксандр Шумілін.
III Міжнародная канферэнцыя «Лазеры, паўправадніковыя выпраменьвальнікі і сістэмы на іх аснове» з'яўляецца працягам беларуска-расійскага семінара «Паўправадніковыя лазеры і сістэмы на іх аснове», які мае больш чым трыццацігадовую гісторыю, ля вытокаў якога стаялі навукоўцы сусветнага ўзроўню – Жарэс Алфёраў, Пётр Елісееў, Аляксандр Надзеждзінскі і інш. Традыцыйна ў яе рабоце ўдзельнічаюць прадстаўнікі арганізацый НАН, РАН, іншых міністэрстваў і ведамстваў Беларусі і Расіі.
