Інстытут мяса-малочнай прамысловасці НАН Беларусі падпісаў з мангольскім інстытутам мемарандум аб супрацоўніцтве
Інстытут мяса-малочнай прамысловасці НАН Беларусі падпісаў мемарандум аб супрацоўніцтве з мангольскім Навукова-вытворчым інстытутам «САМО». Подпісы пад дакументам паставілі кіраўнікі ўстаноў – Гардзей Гусакоў і Луўсанпурэвійн Ганпурэв.
Пагадненне прадугледжвае сумесную работу над навуковымі праектамі, накіраванымі на распрацоўку сучасных тэхналогій і новых рэцэптур у харчовай прамысловасці.
Акрамя таго, бакі плануюць актыўна ўдзельнічаць у розных навукова-практычных мерапрыемствах, такіх як канферэнцыі і семінары.
Асаблівая ўвага надаецца арганізацыі навучальных праграм і стажыровак, якія дазволяць беларускім і мангольскім спецыялістам абменьвацца вопытам і інфармацыяй у галіне аналізу складу і ўласцівасцяў харчовай сыравіны і гатовай прадукцыі з ужываннем сучаснага лабараторнага абсталявання і перадавых методык.
