У Нацыянальнай акадэміі навук Беларусі праходзіць Міжнародны кангрэс маладых спецыялістаў у галіне біялогіі і экалогіі раслін
Мерапрыемства праводзіцца пры падтрымцы Міждзяржаўнага фонду гуманітарнага супрацоўніцтва дзяржаў-удзельніц СНД.
У кангрэсе ўдзельнічае больш за сотню маладых навукоўцаў, у тым ліку з Беларусі, Азербайджана, Арменіі, Кыргызстана, Расіі, Таджыкістана і Узбекістана.
У фокусе ўвагі – будучыня біяразнастайнасці.
Ключавая задача кангрэса – асваенне інавацыйных метадаў маніторынгу навакольнага асяроддзя і аналізу біяразнастайнасці.
Маладыя навукоўцы абмяркуюць механізмы экалагічнай адаптацыі дзікарослых відаў, пытанні забеспячэння бяспекі экасістэм і прынцыпы ўстойлівага ўзаемадзеяння чалавека з прыродным асяроддзем.
З прывітальным словам да гасцей і ўдзельнікаў звярнуўся намеснік Старшыні Прэзідыума НАН Пётр Казакевіч. Ён падкрэсліў, што кангрэс – гэта не толькі тэарэтычныя дыскусіі, але і інтэнсіўная практычная работа. «Мы імкнемся даць маладым спецыялістам інструменты для вырашэння глабальных задач: ад аднаўлення папуляцый рэдкіх раслін да распрацоўкі стратэгій рацыянальнага прыродакарыстання на прасторы Садружнасці», – сказаў Пётр Казакевіч.
Падчас пленарнай сесіі кангрэса Інстытут эксперыментальнай батанікі імя В. Ф. Купрэвіча НАН Беларусі падпісаў пагадненні аб навукова-тэхнічным супрацоўніцтве з Інстытутам батанікі імя А. Л. Тахтаджана НАН Арменіі, Батанічным садам імя Э. З. Гарэева НАН Кыргызстана і Інстытутам батанікі Акадэміі навук Узбекістана.
