Маштабнае мерапрыемства, ініцыяванае пярвічнымі арганізацыямі Беларускага саюза жанчын НАН і БДУ, заклікана папулярызаваць навуковую дзейнасць сярод жанчын і ўмацаваць прафесійнае ўзаемадзеянне паміж даследчыцамі
На пленарным пасяджэнні выступілі прадстаўніцы навуковай супольнасці і дзяржаўнага кіравання краіны: намеснік кіраўніка Адміністрацыі Прэзідэнта Вольга Чупрыс, намеснік старшыні Пастаяннай камісіі Савета Рэспублікі па адукацыі, навуцы, культуры і сацыяльным развіцці Ірына Абельская, намеснік Міністра адукацыі Кацярына Пятруцкая, галоўны вучоны сакратар ВАК Вольга Дубаневіч, акадэмік Эмілія Каламіец, старшыня Беларускага саюза жанчын Вольга Шпілеўская і інш.
Адкрываючы форум, Старшыня Прэзідыума НАН Беларусі Уладзімір Каранік адзначыў, што сёння ў сценах Акадэміі навук назіраецца ўнікальнае спалучэнне інтэлекту і прыгажосці.
Паводле яго слоў, высокая доля жанчын у структуры НАН – каля 50 % – наглядна пацвярджае, што ў краіне створаны ўсе ўмовы, каб рэалізаваць свой патэнцыял у любой сферы, уключаючы навуковую дзейнасць.
Кіраўнік Акадэміі навук падкрэсліў значнасць укладу жанчын у развіццё айчыннай і сусветнай навукі.
«Па шэрагу напрамкаў навуковай дзейнасці можна смела сказаць, што ў беларускай навукі жаночы твар. Азіраючыся назад, мы бачым многіх яркіх прадстаўнікоў навуковай супольнасці, якія пакінулі прыкметны след у навуцы, але калі паглядзець на тое, колькі таленавітых жанчын працуе ў Акадэміі навук сёння, я ўпэўнены, што ўсе лепшыя дасягненні яшчэ наперадзе», – сказаў ён.
Уладзімір Каранік дадаў, што дзякуючы ўвазе Кіраўніка дзяржавы да навуковай сферы, умовы для работы даследчыкаў і развіцця навукі будуць заставацца максімальна камфортнымі.
Ён таксама выказаў упэўненасць, што форум стане добрай штогадовай традыцыяй, а ўдзельніцам пажадаў рухацца да новых навуковых вяршынь і дасягненняў «прыгожа, з усмешкай і абаяннем».
