5 студзеня 2016 г. у Нацыянальным Прэс-цэнтры Рэспублікі Беларусь адбылася прэс-канферэнцыя на тэму: “Прэзентацыя кнігі “Беларусь на шляху ў будучыню: сацыялагічнае вымярэнне” і Рэспубліканскага навуковага кластара вывучэння сацыяльна-палітычнай сітуацыі”. У мерапрыемстве ўзялі ўдзел: дырэктар Інстытута сацыялогіі НАН Беларусі, доктар сацыялагічных навук, прафесар Катляроў Ігар Васільевіч, в.а. нам. дырэктара па навуковай рабоце, кандыдат сацыялагічных навук, дацэнт Лашук Ірына Валер’еўна, кіраўнік Цэнтра сацыялогіі рэгіянальнага развіцця, доктар філасофскіх навук, дацэнт Смірнова Разалія Андрэеўна і загадчык аддзела сацыялогіі сацыяльнай сферы, кандыдат сацыялагічных навук, дацэнт Шухатовіч Віялета Русланаўна.

Галоўная ўвага на прэс-канферэнцыі была нададзена стварэнню ў Інстытуце сацыялогіі НАН Беларусі Рэспубліканскага цэнтра сацыялагічнага маніторынгу, які будзе рэалізоўваць задачу арганізацыі навукова-практычных кластараў з зацікаўленымі арганізацыямі і прадпрыемствамі краіны. Дадзены Цэнтр створаны з мэтай практычнага ўкаранення інавацыйных распрацовак Інстытута з дапамогай стварэння кластараў з іншымі арганізацыямі. Навукоўцы Інстытута сацыялогіі разглядаюць кластарызацыю іх навуковай дзейнасці ў першую чаргу, як сродак прасоўвання сваіх ідэй у рэальную грамадскую практыку. Адбылася таксама прэзентацыя калектыўнай манаграфіі Інстытута сацыялогіі НАН Беларусі “Беларусь на шляху ў будучыню: сацыялагічнае вымярэнне”, дзе аўтары на базе сацыялагічных даследаванняў аналізуюць перспектывы развіцця беларускага грамадства па розных сферах: культура, ахова здароўя, адукацыя, сям’я, сістэма пенсійнага забеспячэння і іншыя.