20 чэрвеня 2016 года ў НАН Беларусі адбылося пасяджэнне Савета Асацыяцыі еўрапейскіх акадэмій навук (ALLEA). У Мінск прыбыла дэлегацыя Савета на чале з Прэзідэнтам Асацыяцыі еўрапейскіх акадэмій навук (ALLEA) Гюнтарам Штокам. Сярод членаў Савета – прадстаўнікі акадэмій навук Германіі, Аўстрыі, Вялікабрытаніі, Італіі, Бельгіі, Фінляндыі, Швейцарыі і інш. У ходзе пасяджэння разгледжаны шэраг пытанняў па арганізацыі навуковай дзейнасці ў Еўропе, у тым ліку вызначэнне праектаў першаступеннай важнасці і магчымасці іх фінансавання, а таксама новыя напрамкі супрацоўніцтва НАН Беларусі з навуковымі арганізацыямі Еўропы.

Перад пачаткам пасяджэння Уладзімір Гусакоў адзначыў неабходнасць актыўнага ўзаемадзеяння Беларусі і еўрапейскіх краін у сферы касмічных даследаванняў, біятэхналогій і нанаіндустрыі. Для гэтага павінны быць наладжаны зносіны паміж вучонымі краін. “Сам факт таго, што пасяджэнне Савета ALLEA адбываецца ў Беларусі, пацвярджае не толькі цікавасць да беларускай навукі, але і яе прызнанне на міжнародным узроўні” – падкрэсліў ён.

Пасля пасяджэння госці азнаёміліся з пастаяннай выстаўкай НАН Беларусі “Дасягненні айчыннай навукі – вытворчасці”, а таксама экспазіцыяй Музея гісторыі НАН Беларусі. Нацыянальная акадэмія навук Беларусі з’яўляецца членам ALLEA з 1994 года. Прадстаўнікі беларускай Акадэміі прымалі ўдзел у Надзвычайным стратэгічным сходзе ALLEA ў лістападзе 2009 года, на якім адбыўся разгляд і абмеркаванне ключавых блокаў Стратэгічнага плана ALLEA на 2010 – 2015 гады, а таксама ў штогадовых пасяджэннях Генеральнай асамблеі ALLEA.