2 жніўня ў НАН Беларусі пад кіраўніцтвам Старшыні Прэзідыума НАН Беларусі Уладзіміра Гусакова адбылася міжведамасная нарада па пытаннях пашырэння супрацоўніцтва з Японіяй і Каралеўствам Саудаўская Аравія. У мерапрыемстве прынялі ўдзел кіраўнікі арганізацый НАН Беларусі, а таксама прадстаўнікі міністэрстваў, ведамстваў і прамысловых прадпрыемстваў краіны. У рабоце нарады ўдзельнічаў Надзвычайны і Паўнамоцны Пасол Рэспублікі Беларусь у Японіі Сяргей Рахманаў. У ходзе мерапрыемства Сяргей Рахманаў зрабіў даклад аб развіцці дзелавых адносін паміж Беларуссю і Японіяй, асабліва падкрэсліўшы нарастанне цікавасці з боку прадстаўнікоў японскага бізнесу да інвестыцый і развіцця супрацоўніцтва з бізнесам і навукай у Рэспубліцы Беларусь.

У ходзе міжведамаснай нарады былі разгледжаны найбольш перспектыўныя напрамкі супрацоўніцтва з Японіяй і Каралеўствам Саудаўская Аравія. Сярод іх: даследаванні ў галіне медыцыны, генетычныя даследаванні, суперкамп’ютары і іх прымяненне ў фізіцы, біялогіі, вывучэнні клімату, даследаванні ў галіне матэрыялазнаўства, нанаматэрыялаў, вырошчванне ў Японіі беларускіх гатункаў бульбы і інш.