Нацыянальная акадэмія навук Беларусі

13.10.2017

Пры падтрымцы Інстытута энергетыкі НАН Беларусі адкрылася самая вялікая ў Беларусі сонечная электрастанцыя

Самая вялікая ў Беларусі фотаэлектрычная станцыя (сонечная электрастанцыя) магутнасцю 55 МВт адкрылася непадалёку ад Рэчыцы. Работы выконваліся пры навуковай падтрымцы Інстытута энергетыкі НАН Беларусі.

Як адзначыў дырэктар інстытута Антон Брынь, акадэмічныя спецыялісты правялі электраабследаванне, распрацавалі ўзбуйненае тэхніка-эканамічнае абгрунтаванне ўкаранення (першапачаткова планавалася будаўніцтва станцыі меншай магутнасці).

Станцыя пабудавана па заказе аб’яднання “Беларуснафта” ў Рэчыцкім раёне на агульнай плошчы 115 га. Тут устаноўлена амаль 218 тыс. сонечных панэляў. Пастаўшчыком абсталявання выступіла славенская кампанія, якая вырабляе фотаэлектрычныя модулі прэміум-класа, а таксама мантажныя сістэмы.

Да гэтага самай магутнай фотаэлектрычнай станцыяй лічыўся комплекс, пабудаваны непадалёку ад Брагіна. Яго намінальная магутнасць дасягае 18,48 МВт.

Калі да нядаўняга часу ў Беларусі працавала ўсяго тры дзясяткі сонечных станцый агульнай магутнасцю ўсяго 41 МВт, то згодна з дзяржаўнай праграмай “Энергазберажэнне” да 2020 года ў Беларусі плануецца будаўніцтва не менш за 250 сонечных электрастанцый.