24 лістапада 2017 года ў Беларускім нацыянальным тэхнічным універсітэце прайшло ўрачыстае адкрыццё і пленарнае пасяджэнне Трэціх Беларускіх Калядных чытанняў, якія былі прысвечаны тэме “Маральныя каштоўнасці і будучыня чалавецтва”. У адкрыцці чытанняў прыняў удзел акадэмік-сакратар аддзялення гуманітарных навук і мастацтваў Аляксандр Каваленя, які зачытаў ад імя Нацыянальнай акадэміі навук Беларусі прывітальнае слова Старшыні Прэзідыума НАН Беларусі Уладзіміра Гусакова. У прывітальным слове Уладзімір Гусакоў падкрэсліў, што гэты форум ўжо “стаў добрай традыцыяй і выражэннем шчырага імкнення да ўдасканалення духоўна-культурнага развіцця беларускага грамадства. У нашым супрацоўніцтве закладзены глыбінны сэнс спазнання свету, мікракосмасу чалавека і нацыянальнай ідэнтычнасці”.

Арганізатарам форуму выступіла Беларуская Праваслаўная Царква пры падтрымцы Міністэрства аховы здароўя Рэспублікі Беларусь, Міністэрства культуры Рэспублікі Беларусь, Міністэрства адукацыі Рэспублікі Беларусь, Міністэрства працы і сацыяльнай абароны Рэспублікі Беларусь і Нацыянальнай акадэміі навук Беларусі.