Нацыянальная акадэмія навук Беларусі

09.11.2018

Урачыстасці, прысвечаныя 90-годдзю НАН Беларусі, адбудуцца 15-16 лістапада 2018 года

15-16 лістапада 2018 года адбудуцца ўрачыстыя мерапрыемствы, прысвечаныя 90-годдзю НАН Беларусі. Чакаецца прыезд вядомых вучоных Саюзнай дзяржавы, СНД, вядучых замежных Акадэмій навук, сусветных навукова-даследчых арганізацый і цэнтраў. У дні юбілейных урачыстасцей пройдзе Трэцяя Міжнародная навукова-практычная канферэнцыя “Навука – інавацыйнаму развіццю грамадства”. Праграма канферэнцыі будзе ўключаць фундаментальныя і прыкладныя пытанні стварэння навукаёмістых тэхналогій, матэрыялаў і прадуктаў па прарыўных напрамках развіцця навукі. Вядучыя вучоныя краіны, замежныя госці выступяць з навуковымі дакладамі па тэматыцы развіцця фізікі, матэматыкі і інфарматыкі, актуальных праблемах фізічнага матэрыялазнаўства, сучасных энергетычных сістэмах, працэсах і тэхналогіях. Будуць прадстаўлены апошнія распрацоўкі ў галіне машынабудавання, інжынерыі паверхняў, хіміі і навук аб Зямлі, сучасных біятэхналогій і экалогіі; медыцынскіх навук, гуманітарных ведаў і аграрных навук.

У дні ўрачыстасцей адкрыецца маштабная выстава вынікаў інавацыйнай дзейнасці вучоных НАН Беларусі. Плануецца, што на ёй будзе прадстаўлена больш за 200 апошніх навукова-тэхнічных распрацовак вучоных. Знойдуць адлюстраванне перадавыя напрамкі развіцця айчыннай навуковай сферы – касмічныя, інфармацыйныя, бія-, нанатэхналогіі, новыя лекавыя сродкі, дасягненні вучоных-аграрыяў. Будзе разгорнута экспазіцыя кніг вучоных-гуманітарыяў, а таксама археалагічная выстава. У вялікай канферэнц-зале Прэзідыума НАН Беларусі адбудзецца ўрачысты сход навуковай грамадскасці краіны, прысвечаны 90-годдзю НАН Беларусі, дзе будуць узнагароджаны лепшыя вучоныя краіны.

Праграма святочных мерапрыемстваў

15 лістапада 2018 года (чацвер)
14.00 - 18.00 – работа Трэцяй Міжнароднай навукова-практычнай канферэнцыі “Навука – інавацыйнаму развіццю грамадства”. З праграмай можна азнаёміцца тут.

16 лістапада 2018 года (пятніца)
(Мінск, пр. Незалежнасці, 66. Будынак Прэзідыума НАН Беларусі)

9.00 - 14.30 – работа выставы вынікаў інавацыйнай дзейнасці вучоных НАН Беларусі.
14.30 - 18.00 - Урачысты сход навуковай грамадскасці, прысвечаны 90-годдзю НАН Беларусі.