У ДНУ “Інстытут фізікі імя Б.І. Сцяпанава НАН Беларусі” ў дзень стварэння інстытута 17 студзеня прайшлі традыцыйныя Сцяпанаўскія чытанні. Калектыў інстытута заслухаў даклады па завершаных ў папярэднім годзе навуковых даследаваннях і распрацоўках, выкананых на высокім навуковым узроўні. Заслухоўванне дакладаў па вылучаных работах і прысуджэнне прэмій на пашыраным пасяджэнні вучонага савета праводзіцца ў інстытуце штогод, пачынаючы з 1958 года. З 1988 года яно носіць назву Сцяпанаўскіх чытанняў у памяць пра Барыса Іванавіча Сцяпанава – дырэктара Інстытута фізікі з 1957 па 1985 год і арганізатара Гадавых чытанняў.

Лаўрэатам Сцяпанаўскіх чытанняў у гэтым годзе сталі супрацоўнікі цэнтра “Фатонікі і фотахіміі малекул” – доктар фізіка-матэматычных навук Джагараў Барыс Міхайлавіч і кандыдат фізіка-матэматычных навук Лепяшкевіч Сяргей Вальдэмаравіч, якія прадставілі цыкл работ “Фотаіндуцыраваныя працэсы ў гемаглабіне і міяглабіне з удзелам малекулярнага кіслароду”.

Традыцыйным стала і адначасовае са Сцяпанаўскімі чытаннямі правядзенне конкурсу маладых навукоўцаў Інстытута фізікі НАН Беларусі на атрыманне прэміі імя акадэміка М.А.Барысевіча.

У гэтым годзе медалём акадэміка М.А. Барысевіча і дыпломам конкурсу ўзнагародзілі навуковага супрацоўніка Цэнтра “Нелінейнай оптыкі і актываваных матэрыялаў” Коўгар Вікторыю Віктараўну за цыкл работ “Спектраскапічныя асаблівасці Yb-змяшчальнага шкла”. Заахвочвальны дыплом конкурсу атрымаў малодшы навуковы супрацоўнік Цэнтра “Фізіка плазмы” Бабіцкі Уладзіслаў Сяргеевіч, які прадставіў на конкурс цыкл работ “Распаўсюджванне магутнага ЗВЧ-выпраменьвання праз электрамагнітныя крышталі з плазменнымі неаднароднасцямі”.