Вадзім Лакіза азнаёміў журналістаў з работамі, якія вядуцца супрацоўнікамі Інстытута гісторыі НАН Беларусі, па захаванні і абароне культурнай спадчыны рэспублікі. “2018 год быў Годам малой Радзімы і ўсе даследаванні былі накіраваны на вывучэнне аб’ектаў, звязаных з разуменнем гісторыі малой Радзімы. У Дзятлаўскім, Слонімскім, Ашмянскім, Жлобінскім, Рэчыцкім, Столінскім, Пінскім, Брэсцкім, Камянецкім і ў шэрагу іншых раёнаў праводзіліся даследаванні гісторыка-культурнай спадчыны разам з раённымі выканаўчымі камітэтамі і школьнікамі”, – паведаміў Вадзім Лакіза. Таксама было адзначана плённае супрацоўніцтва групы падводнай археалогіі з дайвінг-клубам “Марскі Пегас” па вывучэнні Жаберскага замка, месца пераправы арміі Напалеона праз раку Бярэзіну і інш., якія трапілі ў Топ-10 навуковых даследаванняў НАН Беларусі за 2018 г.
Гісторыкі НАН Беларусі прымалі ўдзел у работах па мемарыялізацыі ўрочышчаў Трасцянец і Благаўшчына. Таксама было расказана аб працы гісторыкаў па ўдасканаленні заканадаўчай базы ў галіне аховы гісторыка-культурнай спадчыны.
Алена Трубчык расказала аб грамадзянска-патрыятычным выхаванні грамадзян і навучэнцаў, якое праводзіцца ў рамках дзяржаўнай праграмы на 2015-2020 гг. па ўвекавечанні памяці загінуўшых пры абароне Айчыны і захаванні памяці аб ахвярах войнаў. У рамках гэтай праграмы навукоўцы Інстытута гісторыі супрацоўнічаюць з працоўнымі і адукацыйнымі калектывамі Першамайскага раёна горада Мінска і праводзяць работы па добраўпарадкаванні і ўборцы мемарыяльных помнікаў і месцаў пахавання загінуўшых. Былі прыведзены канкрэтныя прыклады такога супрацоўніцтва.
Фота С.Дубовік, газета “Навука”
