Пярвічныя арганізацыі грамадскага аб’яднання «Беларускі саюз жанчын» НАН Беларусі і ТАА «Магія святла» на базе вытворчай пляцоўкі правялі семінар «Узаемадзеянне навукі і прадпрымальніцтва – крыніца росту і ўмацавання сучаснай эканомікі».
У мерапрыемстве прынялі ўдзел – старшыня Першамайскай раённай арганізацыі г. Мінска ГА «Беларускі саюз жанчын» Пятруцкая К. А., маладыя навукоўцы НАН Беларусі, а ўзначаліў семінар заснавальнік ахоўнай мастацкай галаграфіі ў Рэспубліцы Беларусь, стваральнік двух навукаёмістых, высокатэхналагічных прадпрыемстваў, адно з якіх ТАА «Магія святла» — акадэмік Міжнароднай інжынернай акадэміі, доктар фізіка-матэматычных навук, заслужаны вынаходнік Рэспублікі Беларусь — Танін Л. В.
ТАА «Магія святла» — адзінае ў сваім родзе прадпрыемства, асноўным відам дзейнасці якога з’яўляецца вытворчасць мастацкіх галаграм і галаграфічных сродкаў аховы тавараў народнага спажывання. Для ўдзельнікаў семінара была арганізавана экскурсія па дадзеным прадпрыемстве. У дэманстрацыйнай зале была прадстаўлена дынамічная (свайго роду мікрафільм) галаграма дзяўчыны, якая пасылае паветраны пацалунак.
Намеснік дырэктара ТАА «Магія святла» Гінак С. М. расказаў аб асноўных прынцыпах галаграфіі і фізічных законах, якія ляжаць у яе аснове, а таксама прадэманстраваў працэс атрымання галаграмы на лабараторным узоры мабільнай устаноўкі для запісу галаграм. Прадэманстраваны ўсе этапы запісу галаграмы — ад падстройкі лазера і ўстаноўкі аб’екта запісу да праяўлення запісанага аб’екта і атрымання галаграмы. Затым удзельнікі перайшлі ў лабараторыю, дзе робіцца прамысловы запіс галаграм — ад параўнальна простых, невялікага памеру да ўнікальных буйнафарматных, аптычны стол для запісу галаграм памерам больш чым 2х4 м, распрацаваны і выраблены спецыялістамі прадпрыемства. Таксама была наглядна паказана эвалюцыя лазераў, якія ўжываюцца для запісу галаграм, — ад грувасткіх гелій-неонавых да самых сучасных мініяцюрных з дыёднай накачкай.
Такім чынам, удзельнікі змаглі акунуцца ў атмасферу галаграфічнага працэсу. Абмяркоўваліся пытанні стварэння галаграм віртуальных аб’ектаў з выкарыстаннем камп’ютарнага мадэлявання, стварэння каляровых галаграм, выкарыстання з высокай разрознасцю фотарэзістаў і фотапалімерных матэрыялаў для галаграфіі, шэраг іншых навуковых і тэхналагічных напрамкаў.
