7–9 чэрвеня 2023 года НАН Беларусі прадставіла распрацоўкі на Міжнароднай выстаўцы кааперацыйных праектаў «Еўразія — наш дом» у Сочы, якая прайшла на тэрыторыі Парку навукі і мастацтва «Сірыус» у рамках работы Еўразійскага міжурадавага савета.
Галоўная мэта экспазіцыі — прадэманстраваць інтэграцыйныя праекты ў фармаце галіновых кластараў, падзеленых па асноўных напрамках: прамысловасць, фінансы, лічбавізацыя і лічбавае развіццё, ахова здароўя, турызм, спорт, навука і адукацыя.
На выстаўцы «Еўразія – наш дом» у Сочы арганізацыі НАН Беларусі прадставілі 20 найменняў распрацовак у выглядзе натурных узораў, макетаў, дзеючых мадэляў, якія дэманстраваліся на выстаўцы «Беларусь інтэлектуальная». Сярод іх: авіямадэль мультыротарнага тыпу «Аградрон А60-Х», нейрасеткавы праграмны комплекс для падтрымкі прыняцця рашэнняў пры дыягностыцы захворванняў лёгкіх на аснове рэнтгенаўскіх і тамаграфічных малюнкаў (LungExpert); камплект электронных модуляў сістэмы кіравання цягавай батарэі электрычных транспартных сродкаў і інш. Акрамя таго, былі прадстаўлены распрацоўкі з выкарыстаннем каталогаў, раздатачных матэрыялаў, прэзентацый, відэаматэрыялаў, уключаючы 3D-тур па віртуальнай выстаўцы.
7 чэрвеня 2023 года з распрацоўкамі вучоных НАН Беларусі азнаёміўся Міхаіл Мясніковіч, Старшыня Калегіі Еўразійскай эканамічнай камісіі. 8 чэрвеня з распрацоўкамі вучоных НАН Беларусі азнаёміўся дзяржаўны сакратар Саюзнай дзяржавы Дзмітрый Мезенцаў.
На выстаўцы быў падпісаны шэраг дакументаў. Так, у прысутнасці намесніка Старшыні Урада Расійскай Федэрацыі Дзмітрыя Чарнышова падпісаны Мемарандум аб узаемадзеянні паміж Аб’яднаным інстытутам праблем інфарматыкі НАН Беларусі і АНА ВА «Універсітэт Інаполіс». Аб’яднаны інстытут праблем інфарматыкі НАН Беларусі падпісаў таксама мемарандум з Нацыянальным медыцынскім даследчым цэнтрам дзіцячай траўматалогіі і артапедыі імя Г. І. Турнера Міністэрства аховы здароўя Расіі. ДНУ «Аб’яднаны інстытут машынабудавання НАН Беларусі» і кампанія «LA SOLAR EVA CONSTAL» (Арменія) таксама падпісалі Мемарандум аб узаемадзеянні.
