У Мінскай гарадской ратушы адкрылася выстаўка «Падарожжа ў мінулае: галоўныя артэфакты з археалагічнага комплексу на рацэ Менка», арганізатарамі якой сталі Інстытут гісторыі НАН Беларусі і Музей гісторыі горада Мінска. На выстаўцы прадстаўлена больш за 100 унікальных артэфактаў IX–XII стагоддзяў, у тым ліку фрагменты керамічных гаршкоў і таварныя пломбы з княжымі знакамі прадстаўнікоў полацкай дынастыі. Асобнае месца адведзена знаходкам з комплексу «ювелірная майстэрня», які вынайдзены на другім паселішчы: матрыцам, нарыхтоўкам для стварэння ювелірных вырабаў, спецыяльнаму інструменту ювеліра.

З мэтай выканання даручэння прэм’ер-міністра Беларусі Рамана Галоўчанкі ад 08.12.2022 №34/540-369/13222р НАН Беларусі, Інстытут гісторыі, Мінскі райвыканкам і Міністэрства адукацыі ажыццяўляюць план мерапрыемстваў па рэалізацыі канцэпцыі развіцця археалагічнага комплексу на рацэ Менцы. Комплекс займае Міжрэчча ракі Менкі і ручая Дуная і ўключае ўмацаваныя землянымі абарончымі валамі вялікае і малое гарадзішчы і неўмацаваныя селішчы. Помнікі тэрытарыяльна адносяцца да сучаснай вёскі Гарадзішча Мінскага раёна за дзесяць кіламетраў на захад ад сталіцы Беларусі. Палявы археалагічны сезон 2023 года пачаўся ў красавіку з правядзення інструментальнага даследавання першага паселішча і працягнуўся летам паўнавартаснымі археалагічнымі раскопкамі. На першым селішчы былі закладзены два раскопы агульнай плошчай 220 кв. м, на другім — таксама два раскопы плошчай 104 кв. м. На сёння ў час раскопак выяўлена звыш 300 індывідуальных знаходак і больш за 5000 масавых, пераважна керамічных артэфактаў.

У раскопках пад кіраўніцтвам навукоўцаў і археолагаў з Інстытута гісторыі НАН Беларусі прымаюць удзел студэнты ВНУ краіны, а таксама валанцёры з іншых навучальных устаноў.