Працягваюцца археалагічныя экспедыцыі вучоных Інстытута гісторыі НАН Беларусі.
Комплексная экспедыцыя Інстытута гісторыі НАН Беларусі пад кіраўніцтвам загадчыка аддзела археалогіі першабытнага грамадства Максіма Чарняўскага праходзіць на Крывінскім тарфяніку. Разам з удзельнікамі дайвінг-цэнтра «Марскі Пегас» даследавалася паселішча позняга неаліту — ранняга бронзавага веку Крывіна 3, культурны пласт якога знаходзіцца ніжэй за ўзровень вады ў штучным урочышчы р. Крывінка. Выяўлены шматлікі керамічны матэрыял другой паловы 3 — пачатку 2 тыс. да н. э., фрагменты драўляных канструкцый. Адабраны матэрыялы для спробы пабудовы адноснай дэндрахраналагічнай шкалы. Адпрацавана методыка археалагічных даследаванняў на малой глыбіні.
З 21 ліпеня па 10 жніўня ў Крупскім раёне Мінскай вобласці праходзіць экспедыцыя Інстытута гісторыі НАН Беларусі пад кіраўніцтвам навуковага супрацоўніка аддзела археалогіі першабытнага грамадства Аляксандра Вашанава. Даследуецца помнік ранняга мезаліту — ранняга неаліту, які знаходзіцца каля в. Клішына ва ўрочышчы р. Выспа. Навукоўцы знайшлі шматлікія крамянёвыя і керамічныя вырабы. У адным з раскопаў быў зафіксаваны аб’ект, звязаны з жылым будынкам і пахаваннем, зробленым па абрадзе крэмацыі эпохі ранняга мезаліту (9–8 тыс. да н. э.), што з’яўляецца ўнікальнай з’явай для гэтага рэгіёна. Таксама праведзены даследаванні паселішча 3 чвэрці 3 тыс. да н. э. Асавец 2 (Бешанковіцкі раён Віцебскай вобласці), дзе працягваецца распрацоўка раскопак ранейшых гадоў. Выяўлены шматлікі археалагічны матэрыял — прылады працы, палявання і побыту з косці, рога, крэмнію і каменю, мастацкія і культавыя артэфакты з косці і бурштыну. У вялікай колькасці прадстаўлены керамічны посуд, сярод якога дамінуюць кругладонныя напаўненні. На частцы раскопу зафіксаваны складаны развал драўлянай канструкцыі пакуль нявысветленага характару.