15 жніўня 2023 г. у НАН Беларусі адбыўся візіт дэлегацыі Томскай вобласці Расійскай Федэрацыі на чале з губернатарам Уладзімірам Мазурам. Госці азнаёміліся з апошнімі дасягненнямі вучоных арганізацый НАН Беларусі на пастаянна дзеючай выстаўцы «Дасягненні айчыннай навукі – вытворчасці».

У ходзе сустрэчы з кіраўніцтвам НАН Беларусі былі разгледжаны актуальныя пытанні развіцця навукова-тэхнічнага супрацоўніцтва навуковых арганізацый НАН Беларусі і Томскай вобласці, а таксама механізмы іх рэалізацыі. Як адзначыў першы намеснік Старшыні Прэзідыума НАН Беларусі Сяргей Чыжык, у Акадэміі навук і Томскай вобласці шмат пунктаў для супрацоўніцтва. Акадэмік назваў напрамкі, якія Беларусь гатова прапанаваць Томскай вобласці. У прыватнасці, гэта аграрны напрамак, новыя генетычныя магчымасці, патэнцыял жывёлагадоўлі, новыя сарты раслін, распрацоўкі ў галіне мікраэлектронікі, фатонікі, ЗВЧ-электронікі, тэхналогіі па глыбокай перапрацоўцы торфу, водаачыстцы, абсталяванне і тэхналогіі для медыцыны і г. д. «Мы рыхтуем сумесныя праграмы з Томскай вобласцю, дзе галоўную ролю будуць выконваць Томскі дзяржаўны ўніверсітэт сістэм кіравання і радыёэлектронікі і Інстытут фізікі НАН. У цэлым у нас шмат пунктаў для супрацоўніцтва. І мы будзем іх развіваць, дзяліцца вопытам», — падкрэсліў першы намеснік Старшыні Прэзідыума НАН Беларусі.

У рамках візіту 16 жніўня 2023 г. члены дэлегацыі Томскай вобласці наведалі шэраг навуковых інстытутаў Нацыянальнай акадэміі навук Беларусі.