12 верасня 2023 года адбыўся візіт дэлегацыі правінцыі Шаньдун Кітайскай Народнай Рэспублікі на чале з членам Пастаяннага камітэта партыйнага камітэта, начальнікам Арганізацыйнага аддзела Камуністычнай партыі Кітая правінцыі Шаньдун Ван Юйянь. У склад дэлегацыі таксама ўвайшлі прадстаўнікі кіраўніцтва Канцылярыі замежных спраў Народнага ўрада правінцыі Шаньдун, Дэпартамента адукацыі, Дэпартамента навукі і тэхнікі, Акадэміі навук правінцыі Шаньдун. У ходзе візіту адбыліся перамовы дэлегацыі з першым намеснікам Старшыні Прэзідыума НАН Беларусі С. А. Чыжыкам, на якіх былі абмеркаваны далейшыя крокі па развіцці беларуска-кітайскага навукова-тэхнічнага супрацоўніцтва паміж НАН Беларусі і арганізацыямі правінцыі Шаньдун.

Дэлегацыя прыняла ўдзел у арганізаванай НАН Беларусі сумесна з Акадэміяй навук правінцыі Шаньдун канферэнцыі па абмене вопытам у галіне навукі, тэхнікі і адукацыі. Ад НАН Беларусі канферэнцыю адкрыў першы намеснік Старшыні Прэзідыума НАН Беларусі С. А. Чыжык, з дакладамі выступілі начальнік Галоўнага ўпраўлення міжнароднага навукова-тэхнічнага супрацоўніцтва апарату НАН Беларусі У. В. Падкапаеў, рэктар ДУА «Універсітэт НАН Беларусі» М. Г. Жылінскі, старшыня Навуковага савета — дырэктар выканаўчай дырэкцыі БРФФД А. Я. Дайнека, дырэктар ДНУ «Інстытут фізікі імя Б. І. Сцяпанава НАН Беларусі» С. В. Гапоненка, дырэктар ДНУ «Цэнтр сістэмнага аналізу і стратэгічных даследаванняў НАН Беларусі» В. В. Ганчароў. З кітайскага боку з прывітаннем выступіла член Пастаяннага камітэта партыйнага камітэта, начальнік Арганізацыйнага аддзела Камуністычнай партыі Кітая правінцыі Шаньдун Ван Юйянь, з дакладамі выступілі намеснік дырэктара Дэпартамента навукі і тэхнікі правінцыі Шаньдун Пань Цзюнь, намеснік дырэктара Дэпартамента адукацыі правінцыі Шаньдун Сін Шуньфэн, віцэ-прэзідэнт Акадэміі навук правінцыі Шаньдун Ян Мэйхун, дырэктар Інстытута лазерных тэхналогій Акадэміі навук правінцыі Шаньдун Цзя Чжунчын. Таксама С. А. Чыжык і Ван Юйянь прынялі ўдзел ва ўрачыстай цырымоніі адкрыцця Беларускага даследчага цэнтра Акадэміі навук правінцыі Шаньдун, у рамках якога плануецца супрацоўніцтва ў такіх галінах, як аўтаматызацыя, машынабудаванне, матэматыка, матэрыялазнаўства, біялогія, экалогія, энергія, хімія і іншыя прыродазнаўчанавуковыя напрамкі, гуманітарыстыка, а таксама кіраванне навукай і тэхналогіямі. Ключавымі напрамкамі для падтрымкі вызначаны лазерная фізіка і штучны інтэлект.