НАН Беларусі і Італія будуць развіваць супрацоўніцтва ў сферы сельскай гаспадаркі. Па тэматыцы развіцця жывёлагадоўлі ў канцы лютага будзе праведзены круглы стол з удзелам вучоных Беларусі і Італіі. Такая дамоўленасць дасягнута 23 студзеня 2024 года ў ходзе перамоў Старшыні Прэзідыума НАН Беларусі Уладзіміра Гусакова са Старшынёй Гандлёва-прамысловай палаты Італія-Беларусь Анджэла Ілардзі. У перамовах прыняў удзел пасол Італьянскай Рэспублікі ў Рэспубліцы Беларусь Тамаса П’етра Маркеджані.

Як адзначыў у час сустрэчы Уладзімір Гусакоў, Беларусь і Італію звязваюць даўнія навуковыя сувязі, якія падтрымліваліся ў розных варыянтах. «Мы зацікаўлены ў падтрымцы нашых навуковых сувязей па шырокім спектры навуковых напрамкаў. Супрацоўніцтва навукоўцаў не павінна быць палітызаванае», — падкрэсліў Уладзімір Гусакоў.

У сваю чаргу, Старшыня Гандлёва-прамысловай палаты Італія-Беларусь Анджэла Ілардзі адзначыў, што сёння вельмі важна рэалізоўваць ініцыятывы, якія могуць дапамагчы ў развіцці дыялогу. Круглы стол, які плануецца правесці ў канцы лютага, будзе гэтаму спрыяць. На мерапрыемстве плануецца абмеркаваць такія праблемы, як: механізацыя жывёлагадоўлі, генетыка, лічбавізацыі, эканомія энергарэсурсаў і інш.

Госці падрабязна азнаёміліся з апошнімі распрацоўкамі навукоўцаў, якія прадстаўлены на пастаянна дзеючай выставе «Дасягненні айчыннай навукі — вытворчасці».