15–16 лютага 2024 г. Інстытут філасофіі НАН Беларусі, Інстытут прыкладной матэматыкі РАН імя М. У. Келдыша пры падтрымцы Міністэрства замежных спраў РБ, Дзелавога і культурнага комплексу Пасольства Рэспублікі Беларусь у Расійскай Федэрацыі праводзяць VII Сумесную беларуска-расійскую навукова-практычную канферэнцыю «Праектаванне будучыні і гарызонты лічбавай рэальнасці».
Свет дынамічна мяняецца. Падзеі апошніх некалькіх гадоў (станаўленне лічбавага грамадства, эпідэміялагічная сітуацыя, абумоўленая распаўсюджваннем каранавіруснай інфекцыі COVID-19, санкцыйныя войны і геапалітычная напружанасць) сфармавалі новыя ўмовы, якія аказаліся сур’ёзным выклікам для ранейшых траекторый развіцця. Цяперашняя нявызначанасць у дынаміцы сусветнай сацыяльнай сістэмы патрабуе аб’ектыўнага і сістэмнага аналізу, глыбокага асэнсавання сітуацыі, якая склалася.
Сумесная беларуска-расійская навукова-практычная канферэнцыя «Праектаванне будучыні і гарызонты лічбавай рэальнасці» — навукова-дыскусійны форум, які склаўся па выніках паспяховай рэалізацыі Інстытутам філасофіі НАН Беларусі беларуска-расійскіх навукова-даследчых праектаў. Характэрная рыса гэтага форуму — міждысцыплінарны і сістэмны падыход да праблем, якія разглядаюцца. Поспех таго ці іншага навукова-тэхнічнага, тэхналагічнага праекта залежыць не толькі ад яго патэнцыяльных вынікаў, інфраструктурных магчымасцей укаранення, але і ад гатоўнасці грамадства ўспрымаць навацыі. У сувязі з чым на канферэнцыі ў дыялог па выпрацоўцы навукова абгрунтаваных механізмаў дасягнення ўстойлівага развіцця, сінергетычнага эфекту інтэграцыйных працэсаў паміж Расійскай Федэрацыяй і Рэспублікай Беларусь уцягнутыя навукоўцы як прыродазнаўчых, так і гуманітарных сфер ведаў, інжынеры, кіраўнікі, прадпрымальнікі, выкладчыкі і інш. Асаблівая ўвага пры гэтым надаецца пытанням захавання суверэнітэту, забеспячэння нацыянальнай бяспекі, канкурэнтаздольнасці нашых краін.
Праблемнае поле канферэнцыі:
* Вобраз жаданай будучыні; філасофскія праблемы цывілізацыйнага развіцця сучаснага свету.
* Стратэгія развіцця лічбавага грамадства і лічбавай эканомікі ў свеце, які перманентна змяняецца.
* Стратэгія і напрамкі тэхналагічнай мадэрнізацыі, звязаныя з ёй рызыкі і выклікі.
* Месца Беларусі і Расіі ў глабальных і рэгіянальных цывілізацыйных працэсах.
* Праблемы і перспектывы фарміравання адзінай навукова-тэхналагічнай і адукацыйнай прасторы Саюзнай дзяржавы Беларусі і Расіі.
* Сутнасць сучаснай адукацыі. Адукацыя як асноўны інструмент працы з інавацыйнай будучыняй.
* Гуманітарыстыка, філасофія і навука лічбавай эпохі.
* Навуковае мастацтва і культура лічбавага свету.
* Мадэлі кіравання ў лічбавую эпоху.
* Мадэляванне і прагназаванне сацыядынамікі і развіцця сацыятэхналагічных сістэм.
* Экалагічныя праграмы праектавання будучыні.
* Лічбавыя тэхналогіі як элемент рэалізацыі мэт устойлівага развіцця грамадства.
* Чалавек у эпоху штучнага інтэлекту і робататэхнічнай рэвалюцыі.
Свет уступіў у эпоху турбулентнасці. Зараз утрыманне курсу, бачанне перспектыў развіцця, яснае разуменне мэт і шляхоў іх дасягнення граюць асаблівую ролю. Найважнейшым фактарам забеспячэння прагрэсу і ўстойлівай будучыні нашых дзвюх краін, Саюзнай дзяржавы выступае менавіта навука. Адстойванне ўласнага бачання далейшай эвалюцыі цывілізацыі, забеспячэнне інтэлектуальнай, тэхналагічнай, інфармацыйнай бяспекі магчымае толькі на цвёрдай навуковай аснове. Сумесны беларуска-расійскі форум, які стаў ужо традыцыйным, накіраваны на інтэграцыю намаганняў вучоных і спецыялістаў дзвюх краін для выпрацоўкі сумеснага бачання вобраза жаданай будучыні, а таксама вырашэння актуальных задач на шляху яго пабудовы.
Канферэнцыя пройдзе ў памяшканні Дзелавога і культурнага комплексу Пасольства Рэспублікі Беларусь у Расійскай Федэрацыі (г. Масква, вул. Марасейка, д. 17/6) 15-16 лютага 2024 г. з 10:00 да 18:00.