29 лютага ў НАН Беларусі адбылося пасяджэнне Савета па стратэгічных праектах пры Прэзідэнце Рэспублікі Беларусь. Галоўнай тэмай стала абмеркаванне перспектыўных напрамкаў развіцця мікра-, опта- і ЗВЧ-электронікі ў краіне на перыяд 2025–2040 гады. У яго рабоце прынялі ўдзел прадстаўнікі Міністэрства прамысловасці, Міністэрства адукацыі, высокатэхналагічныя кампаніі, звязаныя з вытворчасцю і прымяненнем мікраэлектронікі, а таксама члены Каардынацыйнага савета інавацыйна-прамысловага кластара «Мікра-, опта- і ЗВЧ-электроніка» і профільныя спецыялісты. У пасяджэнні прыняў удзел памочнік Прэзідэнта Рэспублікі Беларусь (намеснік старшыні Савета) Аляксандр Косінец.
Адкрываючы пасяджэнне, старшыня Савета па стратэгічных праектах пры Прэзідэнце Рэспублікі Беларусь Уладзімір Гусакоў адзначыў, што Беларусь, якая дзякуючы намаганням Кіраўніка дзяржавы захавала і ў гады незалежнасці прымножыла індустрыяльны патэнцыял, дэманструе высокі ўзровень тэхналагічнага суверэнітэту, забяспечвае дружалюбныя краіны неабходнай прадукцыяй. «Мы развілі кампетэнцыі, уласцівыя Беларусі часоў Савецкага Саюза як агульнай “зборачнай пляцоўкі”. Але сёння гэтага недастаткова. Трэба апераджальнае развіццё, заснаванае на перадавых навуковых распрацоўках і мадэрнізаванай “па апошнім слове тэхнікі” вытворчай базе. На гэта нас нацэльвае Прэзідэнт Рэспублікі Беларусь», — падкрэсліў Уладзімір Гусакоў.
Было адзначана, што напярэдадні пасяджэння Савета было праведзена два пасяджэнні Каардынацыйнага савета інавацыйна-прамысловага кластара «Мікра-, опта- і ЗВЧ-электроніка». На іх абмеркаваны вынікі работы кластара ў 2022–2023 гг., план на 2024 г., а таксама перспектыўныя напрамкі распрацовак у галіне мікраэлектронікі. Мэта цяперашняга пасяджэння — вызначыць ключавыя задачы на перыяд да 2040 г., адпрацаваць праблемныя аспекты і прапанаваць іх рашэнні.
На пасяджэнні Савета па стратэгічных праектах 29 лютага быў разгледжаны цэлы шэраг актуальных праблем. Гэта: ход рэалізацыі праекта па мадэрнізацыі крышталёвай вытворчасці (ААТ «Інтэграл»); актуальныя напрамкі развіцця оптаэлектронікі (ДНВА «Оптыка, оптаэлектроніка і лазерная тэхніка»); ЗВЧ-электроніка і мікрасістэматэхніка: тэхналагічныя рашэнні для рэальнага сектара (ААТ «Мінскі НДІ радыёматэрыялаў»); стан і перспектывы электроннага машынабудавання (ААТ «Планар»); матэрыялы для мікраэлектроннай прамысловасці (ДНУ «Інстытут фізікі імя Б. І. Сцяпанава НАН Беларусі», ДНУ «Інстытут фізіка-арганічнай хіміі НАН Беларусі»); праграмнае забеспячэнне ў праектаванні і прымяненні вырабаў мікраэлектронікі (ДНУ «Аб’яднаны інстытут праблем інфарматыкі НАН Беларусі»), развіццё кадравага патэнцыялу мікраэлектронікі (УА «Беларускі дзяржаўны ўніверсітэт інфарматыкі і радыёэлектронікі»), стратэгічныя перспектывы развіцця мікраэлектроннай прамысловасці ў Беларусі (НДЛ «Інтэграваныя мікра- і нанасістэмы» УА «Беларускі дзяржаўны ўніверсітэт інфарматыкі і радыёэлектронікі», НАН Беларусі).
У сваіх выступленнях кіраўнікі прадпрыемстваў і навуковых арганізацый не толькі давалі ацэнку стану спраў у рэспубліцы па тэматыцы дакладу, але і ўносілі канкрэтныя прапановы (абгрунтаванні, разлікі і інш.) па рашэнні пастаўленых пытанняў.
Па выніках пасяджэння будзе сфарміравана рабочая група па разглядзе ўсіх выказаных заўваг і прапаноў, а таксама выпрацаваны канкрэтныя прапановы па развіцці мікра-, опта- і ЗВЧ-электронікі ў краіне да 2040 года.
