7 сакавіка 2024 года НАН Беларусі наведала дэлегацыя Асацыяцыі па развіцці міжнародных даследаванняў і праектаў у галіне энергетыкі «Глабальная энергія» на чале з прэзідэнтам Асацыяцыі Сяргеем Брылёвым. Адбылася сустрэча са Старшынёй Прэзідыума НАН Беларусі Уладзімірам Гусаковым, на якой прысутнічалі акадэмікі-сакратары, кіраўнікі арганізацый Аддзялення фізіка-тэхнічных навук НАН Беларусі. Таксама прайшлі перамовы з Галоўным вучоным сакратаром НАН Беларусі Васілём Гурскім і намеснікам кіраўніка Міжнароднай асацыяцыі акадэмій навук Пятром Віцязем.

Былі абмеркаваны перспектыўныя напрамкі супрацоўніцтва і механізмы яго рэалізацыі, у тым ліку на платформе МААН. Сяргей Брылёў прадставіў прэзентацыю Асацыяцыі, а таксама запрасіў навукоўцаў НАН Беларусі прыняць удзел у конкурсе на прэмію «Глабальная энергія». Госці азнаёміліся з апошнімі распрацоўкамі вучоных на пастаянна дзеючай выставе НАН Беларусі «Дасягненні айчыннай навукі – вытворчасці».

На думку старшыні Прэзідыума НАН Беларусі, беларускія навукоўцы могуць актыўна ўдзельнічаць у конкурсе на прэмію «Глабальная энергія». «Я казаў, што ў нас ёсць адпаведныя распрацоўкі, нашы інстытуты працуюць у гэтым кірунку. Ёсць і ў галіне электратранспарту, працы ў галіне вадароднай і сонечнай энергетыкі. Нам ёсць што прадстаўляць, і мы будзем прадстаўляць нашы распрацоўкі», — запэўніў Уладзімір Гусакоў. Сяргей Брылёў падзякаваў Уладзіміру Гусакову за магчымасць убачыць вельмі цікавыя распрацоўкі беларускіх навукоўцаў, у тым ліку ў галіне энергетыкі.

Асацыяцыя «Глабальная энергія» — няўрадавая арганізацыя, створаная для прасоўвання і падтрымкі інавацый у галіне энергетыкі, а таксама развіцця міжнароднага супрацоўніцтва.