13 сакавіка 2024 года ва УА «Нацыянальны дзіцячы тэхнапарк» адбылося мерапрыемства па абароне справаздач аб выніках навуковых даследаванняў (інавацыйных праектаў), для выканання якіх былі вылучаны гранты Прэзідэнта Рэспублікі Беларусь у сферах навукі, адукацыі, аховы здароўя, культуры, маладзёжнай палітыкі на 2023 год. У яго рабоце прыняў удзел намеснік прэм’ер-міністра Ігар Петрышэнка, Старшыня Прэзідыума НАН Беларусі Уладзімір Гусакоў, найвышэйшыя службовыя асобы краіны.
На прэзентацыйнай выставе кіраўнікі і спецыялісты, якім былі вылучаны штомесячныя гранты ў 2023 годзе, прадставілі свае вынікі навуковых даследаванняў. Выстава складалася з некалькіх тэматычных блокаў па 5 сферах (навука, адукацыя, ахова здароўя, культура, маладзёжная палітыка). Былі прадстаўлены навуковыя распрацоўкі ў галіне біятэхналогій, медыцынскіх і нанатэхналогій, новых матэрыялаў, беспілотных лятальных апаратаў, ваеннай тэматыкі. Усяго — каля 50 работ, у сферы «навука» — 10 работ. Ад НАН Беларусі свае работы прадстаўлялі Ганна Анісовіч, галоўны навуковы супрацоўнік канструктарска-тэхналагічнага аддзела Інстытута прыкладной фізікі, доктар фізіка-матэматычных навук, прафесар; Аляксандр Ізабела, начальнік аддзела спецыяльных тэхналогій апрацоўкі матэрыялаў ціскам — загадчык лабараторыі дакладнай штампоўкі і папярочна-клінавай пракаткі Фізіка-тэхнічнага інстытута, кандыдат тэхнічных навук і Сяргей Шарко, старшы навуковы супрацоўнік лабараторыі фізікі магнітных плёнак НПЦ НАН Беларусі па матэрыялазнаўстве, кандыдат фізіка-матэматычных навук.
Адбылося пасяджэнне Рэспубліканскай камісіі па разглядзе кандыдатур, якія вылучаюцца для атрымання грантаў Прэзідэнта ў сферах навукі, адукацыі, аховы здароўя, культуры, маладзёжнай палітыкі.
Перад пасяджэннем Рэспубліканскай камісіі намеснік прэм’ер-міністра Ігар Петрышэнка адзначыў, што сродкі, якія выдзяляюцца Прэзідэнтам у рамках грантаў, ідуць на практычную рэалізацыю задумак атрымальнікаў. «Па выніках сённяшняга пасяджэння да 1 красавіка прадставім даклад кіраўніку дзяржавы. Цыкл падрыхтоўкі вылучэння на гранты адпаведных праектаў адкрыты, і кожны ў сваім кірунку можа вылучыць, абараніць іх і атрымаць матэрыяльную падтрымку для распрацоўкі і рэалізацыі сваёй задумкі», — заявіў Ігар Петрышэнка.
У сваю чаргу, Старшыня Прэзідыума НАН Беларусі Уладзімір Гусакоў падкрэсліў, што ўсе праекты атрымальнікаў гранта Прэзідэнта ў 2023 годзе паказалі высокую эфектыўнасць. «Гранты цалкам апраўданыя і паказалі сваю эфектыўнасць. Гранты не так ужо проста атрымаць. Неабходна даказаць сваю эфектыўнасць. Для гэтага працуе і камісія, якая ацэньвае праект на розных этапах, пасля гэтага праект разглядаюць у Савеце Міністраў і ў канцы матэрыялы падаюцца на зацвярджэнне Прэзідэнту», — растлумачыў Уладзімір Гусакоў.