Першы выпуск выйдзе ў эфір 7 красавіка.
“Навукаманія” стане пропускам гледачоў у свет навуковых адкрыццяў, вынаходстваў і новых тэхналогій. Як уладкованы наш свет, як працуюць тэхналогіі, як ствараюцца рэчы, якія нас акружаюць, - пра ўсё гэта гледачы даведаюцца з “Навукаманіі”. Разам з тым, галоўная мэта праграмы - папулярызацыя беларускай навукі.
Кожны выпуск праграмы будзе прысвечаны адной-двум цэнтральным тэмам, пра якія раскажа вядучы ў студыі і спецыяльна запрошаныя госці: аўтарытэтныя вучоныя, супрацоўнікі Акадэміі навук, кіраўнікі навуковых інстытутаў і іншыя. Тэлегледачы таксама ўбачаць спецыяльныя тэматычныя рэпартажы з розных навуковых устаноў.
Тэмы першых выпускаў: праблемы змянення клімату, генетыка чалавека, лекі новага пакалення, акадэмічная фізічная навука - эканоміцы краіны, таямніцы чалавечага мозгу, прамысловыя біятэхналогіі.
Вядучая праграмы - Кацярына Бірэцкая.