Нацыянальная акадэмія навук Беларусі

06.12.2016

У Алматы 17-18 лістапада адбыўся II Еўразійскі форум маладых вучоных (YES-Forum)

У Алматы 17-18 лістапада 2016 года прайшоў II Еўразійскі форум маладых вучоных (YES-Forum). Фармат Форуму істотна адрозніваецца ад традыцыйных навуковых канферэнцый. У фокусе YES Forum - навуковыя прарывы, інавацыйныя праекты і сацыяльна-эканамічная дынаміка ў кантэксце развіцця інтэграцыйных працэсаў на еўразійскай прасторы. Праекты, якія прадстаўляліся на Форум, насілі міждысцыплінарны характар, выразную практычную накіраванасць і выконваліся аўтарскімі калектывамі як мінімум з дзвюх краін ЕАЭС. На працягу года ў аргкамітэт Форуму паступіла больш за 100 праектаў па трох напрамках (Material Science, Life Science і Social Science), якія прайшлі пільны адбор. Пятнаццаць лепшых былі прадстаўлены на пітч-сесіі, мэтай якой было зацікавіць інвестара і прыцягнуць фінансаванне для камерцыялізацыі свайго праекта.

Акрамя прэзентацый праектаў Форум уключаў у сябе незвычайныя па фармаце зносін сустрэчы - сняданкі з інвестарам “Face to Face”. Ідэя такога мерапрыемства заключаецца ў арганізацыі нефармальных зносін паміж распрацоўшчыкамі і прадстаўнікамі бізнесу. Гэта адна з дыялогавых пляцовак, дзе можна абмеркаваць дэталі раней прадстаўленых праектаў, умовы інвеставання ў бізнес-праекты і правесці ацэнку ўспрымання інвестарамі прапанаваных маладымі вучонымі распрацовак.

Таксама на Форуме прайшлі майстар-класы для маладых вучоных, якія правялі запрошаныя спікеры з Расіі, Беларусі, Францыі, Індыі. Дакладчыкі пастараліся данесці да ўдзельнікаў, як правільна прайсці шлях ад ідэі да яе практычнай рэалізацыі і камерцыялізацыі, як навучыцца крэатыўна падыходзіць да вырашэння стандартных задач, як рыхтаваць інвестыцыйныя праекты.

З удзелам беларускіх маладых вучоных на форуме быў прадстаўлены шэраг праектаў па ўсіх трох напрамках, якія ўключаюць распрацоўкі ў галіне стварэння новых функцыянальных матэрыялаў для абароны мікраэлектроннай тэхнікі ад іанізуючых выпраменьванняў, прымянення мембранных тэхналогій, вывучэння харчовай каштоўнасці спецыялізаваных прадуктаў харчавання і іншыя.

Заключным акордам форуму стаў круглы стол з удзелам прадстаўнікоў саветаў маладых вучоных Казахстана, Расіі, Беларусі, Арменіі, Азербайджана, Таджыкістана, на якім было прынята аднагалоснае рашэнне аб правядзенні III Еўразійскага форуму маладых вучоных у 2018 годзе ў Арменіі.

Андрэй Іванец, Старшыня Савета маладых вучоных НАН Беларусі