Нацыянальная акадэмія навук Беларусі

22.08.2017

Беларускі вучоны Іван Саверчанка стаў лаўрэатам прэміі “Зоркі Садружнасці”

Беларускі вучоны-філолаг, дырэктар Інстытута літаратуразнаўства імя Янкі Купалы ДНУ “Цэнтр даследаванняў беларускай культуры, мовы і літаратуры Нацыянальнай акадэміі навук Беларусі”, член Прэзідыума Саюза пісьменнікаў Беларусі, доктар філалагічных навук, прафесар Іван Саверчанка стаў лаўрэатам міждзяржаўнай прэміі “Зоркі Садружнасці”. Пра гэта паведамляецца ў афіцыйным пісьме Міждзяржаўнагга фонду гуманітарнай садружнасці дзяржаў – удзельніц СНД. Згодна з рашэннем Савета па прысуджэнні міждзяржаўнай прэміі “Зоркі Садружнасці” за 2016 год Іван Саверчанка ўдастоены звання лаўрэата прэміі. Урачыстая цырымонія ўзнагароджання лаўрэатаў адбудзецца ў Маскве. Зараз дата ўзнагароджання ўдакладняецца.

Іван Саверчанка – вядомы вучоны-філолаг, аўтар шматлікіх гістарычных аповецей і эсэ пра знакамітых асоб мінулага Беларусі. Яго кнігі шырока выкарыстоўваюцца ў адукацыйнай практыцы для навучання студэнтаў краін СНД. Аўтар 114 навуковых публікацый па праблемах філалогіі, гісторыі і філасофіі, у тым ліку васьмі манаграфій. Падрыхтаваў сем выданняў помнікаў беларускага пісьменства і славеснасці ад Х да першай паловы ХХ стагоддзя, якія ўпершыню сабраны разам і адаптаваны для рускамоўнага чытача.


Прэмія “Зоркі Садружнасці”, заснаваная Саветам па гуманітарным супрацоўніцтве дзяржаў СНД і Міждзяржаўным фондам гуманітарнага супрацоўніцтва дзяржаў – удзельніц СНД, прысуджаецца штогод за найбольш значныя поспехі ў сферы гуманітарнай дзейнасці, якія адпавядаюць узроўню сусветных дасягненняў і садзейнічаюць развіццю як кожнай з краін СНД, так і Садружнасці ў цэлым. Прэмія ўручаецца па трох намінацыях: за дасягненні ў галіне навукі і адукацыі, культуры і мастацтва, а таксама ў гуманітарнай дзейнасці. У кожнай з трох намінацый прысуджаецца да трох прэмій.